Hér koma myndir af Karólínu ÞH 100 á siglingu á Skjálfanda og eigendum Doddu ehf. sem á og gerir Karólínu út.

2760.Karólína ÞH 100. © Hafþór.

Eigendur Karólínu ÞH, fv. Gunnlaugur Karl Hreinsson, Haukur Eiðsson, Jóhann Gunnar Sigurðsson og Örn Arngrímsson. © Hafþór.

Langar að geta þess að þegar þetta er skrifað á tólfta tímanum í kvöld hef ég reynt í þrígang að koma því að á fréttavef Morgunblaðsins, blaði allra landsmanna, að nýr bátur hafi bæst í flota húsvíkinga. Það hefur engan árangur borið þrátt fyrir að um nýsmíði sé að ræða. Það var nú reyndar ein smáfrétt um sjávarútveg á mbl.is á föstudagskvöldið og kannsk er það nóg í bili. En ég sem sagt sendi fyrst frétt og mynd kl. 7,30 í morgun og ekkert birtist. Aftur sendi ég texta og nýja mynd frá því í dag  um kl. 15.30 en ekkert birtist. Þá voru helstu innlendu fréttirnar fram að þessum tíma þær að að menn höfðu jú eitthvað verið að keyra ölvaðir, verið var að dæma menn fyrir ölvunar- og eða akstur undir áhrifum fíkniefna ásamt því að það var einhversstaðar að hvessa og menn misstu bíla út af eða lentu í árekstri. Svo má ekki gleyma því að 38% bifreiða í Reykjavík eru á negldum hjólbörðum ásamt því að seyðfirðingar vilja hafa ríkið eins og það hefur verið. Kl. 20.36 sendi ég svo nýjan texta og mynd af Karólínu en ekkert hefur birts enn enda fór fréttaflæðið af innlendum vettvangi að glæðast þegar leið á. Það hvessti og allt lauslegt fór að fjúka á horninu og nóg að gera. Um kl. 22 kom svo aðalfrétt dagsins. Ævisöguritari Hannesar H. Gissurarsonar var búinn með fyrsta upplag og forleggjarann vantaði ljósritunarvél og þar með var komin frétt og símanúmerið fylgdi. Ætli maður geti sent inn frétt á mbl.is um að gamalt barnarúm vanti nýtt heimili ?
En jákvæðar sjávarúrvegsfréttir ! Nei þið getið átt þær. En ef nýi báturinn verður fyrir því að það þurfi að draga hann í land eða eitthvað álíka þá er birtingin vís. Þá get ég bent á það að þegar gamla Karólína hélt úr höfn áleiðis til nýrrar heimahafnar í Bolungarvík undir nýju nafni reyndi ég að koma frétt þar um á mbl.is en ekkert gekk. Þar var um að ræða fyrsta línubátinn í smábátakerfinu sem útbúinn var með beitningavél og gerður út frá Bolungarvík. En það var nú ekkert, ég beið eftir því næstu daga að vefmiðlar á Ísafirði og í Bolungarvík segðu frá þessu. En nei ekkert kom, þrífast þeir kannski á neikvæðum fréttum úr sjávarútvegi fyrir vestan ?

Ný og glæsileg Karólína þH 100 kom til heimahafnar á Húsavík undir miðnætti í gær eftir siglingu frá Hafnarfirði. Heimferðin gekk ágætlega að sögn Hauks Eiðssonar skipstjóra. Reyndar þurftu þeir að fara inn á Flateyri vegna veðurs en Haukur segir bátinn hafa reynst vel á heimsiglingunni. Gaman er að geta þess að þetta er ekki í fyrsta skipti sem nýsmíðaður bátur á heimsiglingu til Húsavíkur hefur þurft að leita til hafnar á Flateyri vegna veðurs. Í marz 1975 var Kristbjörg ÞH 44 á heimsiglingu frá Stykkishólmi og beið af sér brælu á Flateyri. Kristbjörgin reyndist húsvíkingum happaskip og vonandi á það eftir að liggja fyrir Karólínu einnig.

2760.Karólína ÞH 100. © Hafþór.

Þeir Karólínumenn fóru fyrir mig í myndatökusiglingu í dag og koma fleiri myndir hér inn síðar í dag.

Bátur vikunnar var smíðaður í Þýskalandi árið 1959 fyrir Miðnes hf. í Sandgerði. Hann var 74 brl. að stærð, með 400 hestafla MWM aðalvél og hét Jón Gunnlaugs GK 444. Báturinn var seldur Tómasi Sæmundssyni í Reykjavík í desember 1970. Þá fékk hann nafnið Hafnarberg RE 404. Í dag heitir hann Dúa SH 359 en á undanförnum árum hefur hann borið nöfnin Jói á nesi SH og Jói gasalegi SH. Eigandi bátsins í dag er skráður M.B.Dúa ehf.

617.Dúa SH 359 ex Jói Gasalegi SH. © Hafþór.

617.Hafnarberg RE 404 ex Jón Gunnlaugs GK 444. © Hafþór.

Hér koma þrjár myndir sem ég tók í Grindavík á árum áður (c.a. 1985-1988). Þær eru ekki teknar á sama tíma og sína þrjá grindvíska báta koma til hafnar.

23.Már GK 55 ex Baldur EA 12. © Hafþór.

1173.Sigrún GK 380 ex Sæþór KE 70. © Hafþór.

1028.Hrafn Sveinbjarnarson GK 255. © Hafþór.

Hér kemur mynd sem Óskar Franz sendi mér af Jóni Kjartanssyni SU 111 í höfn í Leirvík. Myndin er af vef Shetland Museum.

228.Jón Kjartansson SU 111 ex Sigurey SI 8.

Það er minnst á Þorstein Gíslason þann mikla aflaskipstjóra í álitum hér við fyrri færslu. Þorsteinn og kona hans, Vilborg Vilmundardóttir eru skólasystkini tengdamömmu minnar frá Handavinnudeild Kennaraskólans. Þau ásamt öðrum skólasystkinum, sem útskrifuðust um leið og þau, hafa verið dugleg í gegnum tíðina að ferðast saman um landið. Sumarið 2006 var komið  að Þingeyjarsýslu og komu þau m.a. í heimsókn til okkar í sumarbústað foreldra minna í Sultum í Kelduhverfi. Við það tækifæri tók ég þessa mynd af þeim hjónum Vilborgu og Þorsteini.

Hér kemur mynd sem Þorsteinn Pétursson á Akureyri sendi mér fyrir nokkru síðan. Hún sýnir togarann Jörund EA 335 sem var smíðaður í Englandi 1949 fyrir Guðmund Jörundsson útgerðarmann á Akureyri. Þórólfur Mostraskeggur hf. í Stykkishólmi kaupir togarann í ársbyrjun 158 og nefnir Þorstein Þorskabít SH 200. Upphaflega var í skipinu 950 hestafla Mirrles díeselvél en 1963 er sett ný vél, 950 hestafla Deutz díeselvél. Í maí 1963 var Ríkissjóður Íslands skráður eigandi skipsins. Skipið hét þegar þarna var komið við sögu Sigurey EA 8 og var í eigu Sigurðar Finnssonar á Siglufirði. 1966 kaupir grímur hf. á Eskifirði skipið, það fékk nafnið Jón Kjartansson SU 111. Jón Kjartansson sökk út af Vattarnesi 28 janúar 1978 og bjargaðist áhöfnin, 12 manns, í gúmmíbjörgunarbát og þaðan um borð í Dagfara ÞH 70.
                                                                                         Heimild Íslensk skip.

228.Jörundur EA 335.

Haustið 2005 var ég í Keflavík þegar dragnótabátarnir voru að koma að landi eftir fyrsta róðurinn á vertíðinni í Faxaflóa. Ég tók myndir af bátunum koma að landi og einnig þessa mynd af Erni Erlingssyni útgerðarmannni.

Örn Erlingsson. © Hafþór.

þessa mynd sendi ég í Morgunblaðið og þessi texti hér að neðan fylgdi myndinni:

Miðvikudaginn 7. september, 2005 - Úr verinu

Gramsað í soðið

Kolavertíðin á Faxaflóa er nú hafin og voru bátarnir með þokkalegan afla úr fyrstu veiðiferðunum. 14 bátar hafa leyfi til veiðanna og eru þær háðar ýmsum takmörkunum auk venjubundins kvóta. Hér er Örn Erlingsson útgerðarmaður kátur að gramsa eins og Erlingur sonur hans sagði. Það er að segja hann var að fá sér kola í soðið en Örn KE 14 sem þeir feðgar gera út var með góðan afla fyrsta daginn.

2313.Örn KE 14. © Hafþór.

Hér birti ég mynd af Mola sem ég tók af honum sumarið 2003. Moli var þá skipshundur á Snæbjörginni ÍS sem var á rækjuveiðum og landaði oft á Húsavík. Nú væri gaman ef menn hafa einhverjar vitneskju um skipshunda hér áður fyrr, ég man að Bóbi á Sigurði var oft með hund heima í fríum. Man ekki hvort það var þegar Bóbi var með Örfirisey eða Sigurð nema hann, sem var tík minnir mig, hafi fylgt Bóba yfir á Sigurð.

Moli í stafni Snæbjargar ÍS. © Hafþór.
Ég skrifaði smá frétt um Mola og sendi í Morgunblaðið með þessari mynd hér að ofan:

Hér eru tvær gamlar myndir úr myndasafni Sigurgeirs Harðarsonar af Pétri Jónssyni RE 69.

1061.Pétur Jónsson RE 69. © Sigurgeir Harðarson.

1061.Pétur Jónsson RE 69 ex Eldey KE 37.

Bátur vikunnar að þessu sinni strandaði undir Krísuvíkurbjargi mánudaginn 10. marz 1997. Þetta er Þorsteinn GK 16 og  var áhöfn hans að leggja netin þegar þau fóru í skrúfuna og báturinn varð vélavana. Þyrla Landhelgisgæslunnar bjargaði áhöfn bátsins þegar ljóst var að hann var að reka upp í bjargið eftir að báðar akkerisfestarnar höfðu slitnað. 10 manna áhöfn var á bátnum sem eyðilagðist á strandstað.  Heimild Morgunblaðið

Þorsteinn GK 16, sem hét upphaflega Lómur KE 101,var smíðaður í Noregi árið 1963 fyrir Brynjólf hf. í Keflavík. Hann mældist þá 202 brl. og aðalvél hans var 660 hestafla Lister. Hann var endurmældur 1969 og mældist þá 178 brl. að stærð. 1. október 1973 er hann seldur Kópanesi hf. í Reykjavík og fékk þá nafnið Kópur RE 175. Í janúarbyrjun 1977 kaupa Guðmundur Þorsteinsson og Jóhannes Jónsson í Grindavík bátinn sem heldur nafninu en fær einkennisstafina GK og númerið 175. 1979 var sett í bátinn 720 hestafla Mirrles aðalvél. frá 14. ágúst 190 er eigandi skráður Hóp hf. í Grindavík og báturinn fékk nafnið Þorsteinn GK 16. Þorsteinn var yfirbyggður og sett ný brú á hann. Heimild Íslensk skip.

145.Þorsteinn GK 16 ex Kópur GK 175. © Hafþór.

Ný Karólína ÞH var sjósett í Hafnarfirði fyrir helgina og að sögn Hauks Eiðssonar skipstjóra er hann væntanlegur til heimahafnar þegar líður á vikuna. Karólína sem er með einkennisstafina ÞH og númerið 100 er sömu gerðar og Háey II ÞH 275 sem kom ný til heimahafnar á Húsavík í ágúst sl. Haukur skipstjóri ljáði mér þessar myndir sem hann fékk sendar af sjósetningunni. Hann ætlaði að vera viðstaddur sjósetninguna en komust ekki suður þar sem flugi seinkaði vegna veðurs sl. föstudagsmorgun.

2760.Karólína ÞH 100.

Karólína sjósett.

2760.Karólína ÞH 100 komin á flot.

Þessir tveir eikarbátar sem sagt er frá í færslunni hér á undan komu báðir við sögu í útgerðarsögu húsavíkur á síðustu öld.

Í febrúar 1969 keyptu Skálabrekkufeðgar, þeir Olgeir Sigurgeirsson og Sigurður  og Hreiðar synir hans, Kristjón Jónsson SH frá Ólafsvík, hann hafði verið í eigu Korra hf. Keyptu þeir feðgar hlutafélagið um leið og fluttu það til Húsavíkur. Báturinn fékk nafnið Kristbjörg ÞH 44. Í ársbyrjun 1975 fékk hann nafnið Kristbjörg II ÞH 244 en fyrirtækið fékk nýja Kristbjörgu ÞH 44 afhenta í Stykkishólmi í marz það sama ár. Það var 50 brl. eikarbátur smíðaður í Skipavík líkt og hinn fyrri sem var 37 brl. að stærð. Þessir bátar voru báðir í rekstri hjá Korra hf. þangað til í ársbyrjun 1980 að Kristbjörg II er seld þeim Agli og Aðalgeir sonum Olgeirs. Þeir nefndu bátinn Skálaberg ÞH 244 og hófu útgerð hans í janúar 1980 og var síðuskrifari í áhöfn hans þá og næstu þrjú árin. Egill og Aðalgeir gerðu bátinn út til haustsins 1985 er þeir seldu hann vestur til Flateyrar. 

1995 keypti útgerðarfélagið Flóki á Húsavík 70 brl eikarbát, Geir ÞH 150, frá Þórshöfn. Að útgerðinni standa hjónin Óskar Karlsson og Ósk Þorkelsdóttir. Báturinn, sem smíðaður var í Danmörku árið1955, fékk nafnið Guðrún Björg ÞH 60. þennan bát átti Flóki hf. til ársins 1999 er hann var seldur til Patreksfjarðar.
                                                                          Heimild. Saga Húsavíkur.

1053.Skálaberg ÞH 244 ex Kristbjörg II ÞH 244. © Hafþór.

462.Guðrún Björg ÞH 60 ex Geir ÞH 150. © Hafþór.

Tveir bátar sukku í höfnum hér við land um helgina, aðfaranótt laugardags sökk Fanney RE við Skipavíkurbryggjuna í Stykkishólmi. Fanney, sem er 37 brl. eikarbátur, hefur legið lengi við bryggju. Fyrst nokkur ár á Patreksfirði, þá um tíma í Ólafsvík þaðan sem hann var dreginn til Stykkishólms. Fanney sökk því á þeim slóðum sem hún flaut fyrst á því báturinn var smíðaður í Stykkishólmi árið 1967, hét þá Kristjón Jónsson SH 77 og var í eigu útgerðar í Ólafsvík.
Þá sökk 70 brl. eikarbátur, Brokey BA frá Patreksfirði, í Reykjavíkurhöfn síðdegis í gær. Báturinn hefur legið í hirðuleysi, að sögn hafnsögumanns, í höfninni undanfarin ár. Brokey var smíðuð í Danmörku 1955 og hét upphaflega Glófaxi NK.
Heimildir um þessa atburði fékk ég á www.mbl.is og www.visir.is

1053.Bára ÍS 364 ex Bára SH. Í dag Fanney RE 31. © Hafþór.

462.Brokey BA 336 ex Eyjanes GK. © Hafþór.