Skipamyndir Hafþórs Hreiðarssonar

16.11.2018 19:57

Wilson Sky á Húsavík

Flutningaskipið Wilson Sky liggur nú við Bökugarðinn á Húsavík þar sem skipað er upp hráefnisfarmi fyrir PCC á Bakka.

Wilson Sky var smíðað árið 2001 og var smíðað árið 2001. Það siglir undir flaggi Kýpur með heimahöfn í Limassol.

Það er 3.037 GT að stærð.

Wilson Sky kom til Húsavíkur árið 2007 og tók ég þá þessa mynd af því.

Myndina hér að neðan tók ég hinsvegar um kaffileytið í dag.

Wilson Sky. © Hafþór Hreiðarsson 2018.

16.11.2018 18:17

Nýr Indriði Kristins BA 751

Útgerðarfélagið Þórsberg ehf á Tálknafirði fékk á dögunum afhentan nýjan yfirbyggðan Cleopatra 46B beitningavélarbáta frá Bátasmiðjunni Trefjum í Hafnarfirði.

Framkvæmdastjóri Þórsbergs er Guðjón Indriðason. Nýi báturinn heitir Indriði Kristins BA 751. Báturinn er 14metrar á lengd og mælist 30brúttótonn.  Báturinn leysir af hólmi eldri Cleopatra bát með sama nafni. 

Skipstjórar á bátnum eru Indriði og Magnús Guðjónssynir.

 

Aðalvél bátsins er af gerðinni Doosan 4V222TI 880hö (22L) tengd frístandandi ZF 665 V-gír.

Rafstöð er af gerðinni Scam/FPT/Linz 84kW (60kVA) frá Ásafli.

Báturinn er útbúinn siglingatækjum af gerðinni JRC frá Sónar ehf.

Báturinn er einnig útbúin með vökvadrifnum hliðarskrúfum að framan og aftan sem tengdar eru sjálfstýringu bátsins.

Báturinn er útbúinn til línuveiða.  Beitningavél, rekkakerfi og línuspil er frá Mustad í Noregi.

Búnaður á dekki er frá Stálorku.

Ísvél og forkælir er frá Kælingu ehf.

Löndunarkrani á er af gerðinni TMP frá Ásafli ehf.

Lífbátar og annar öryggisbúnaður bátsins kemur frá Viking.

 

Rými er fyrir allt að 72stk 460lítra kör í lest.  Millidekk er lokað með aðgreindu dráttarrými.  Í bátnum er upphituð stakkageymsla fyrir 6manns.  Stór borðsalur.  Salerni/sturta.  Þvottavel og þurrkari.  Svefnpláss er fyrir sex í lúkar í 4 aðskyldum klefum.

Fullbúið eldhús er um borð með öllum nauðsynlegum búnaði.  S.s. eldavél, bakarofni, örbylgjuofn, ísskáp og uppþvottavél.

Báturinn er útbúinn til lengri útiveru ef þarf og aðbúnaður um borð fyrir áhöfn í takt við það.

2947. Indriði Kristins BA 751. © Trefjar.is 2018.

 

 

14.11.2018 19:40

Karólína á heimstími

Hér er línubáturinn Karólína ÞH 100 á heimstími til Húsavíkur fyrir nokkrum vikum.

2760. Karólína ÞH 100. © Hafþór Hreiðarsson 2018.

13.11.2018 20:50

FWN Splendide

Flutningaskipið FWN Splendide er á Húsavík í dag og losar hráefni til PCC á Bakka.

Skipið er 146 metrar að lengd, 18 metra breitt og mælist 7767 GT að stærð.

Skipið var smíðað árið 2005 og siglir undir hollensku flaggi.

FWN Splendide við Bökugarðinn. © Hafþór Hreiðarsson 2018.

11.11.2018 18:03

Dagatalið 2019

Skipadagatalið 2019 er í vinnslu og búið að velja nokkrar myndir.  Stefni á prentun í byrjun desember.

Áhugasamir geta pantað dagatalið á korri@internet.is 

Verðið verður á svipuðum nótum og verið hefur. Uppl. um það er hægt að fá á korri@internet.is

Þá er hugmynd um að gera annað dagatal með bátum undir 30 bt. að stærð ef tiltekinn fjöldi pantanna næst.

Áhugasamir geta einnig pantað það dagatal á korri@internet.is 

Svona leit forsíðan út árið 2017.

 

11.11.2018 17:55

Fjordvik við bryggju í Keflavík

Hér koma myndir sem Jón Steinar tók í Keflavík í gær. Þær sýna sementsflutningaskipið Fjordvik við bryggju en þangað var það dregið af strandstað við Helguvíkurhöfn..

Fjordvik við bryggju í Keflavík. © Jón Steinar 2018.

 

Fjordvik í Keflavíkurhöfn. © Jón Steinar 2018.

 

Fjordvik. © Jón Steinar 2018.

11.11.2018 13:07

Sigurfari GK 138

Mynd síðan í marsmánuði 2009 af Sigurfara GK 138, áður VE 138.

1743. Sigurfari GK 138 ex Sigurfari VE. © Hafþór Hreiðarsson 2009.

09.11.2018 16:33

Huginn VE 55

Huginn VE 55 fór í prufusiglingu frá Gdansk í dag en þar hefur hann verið í breytingum í Alkorskipasmíðastöðinni. Síðan átti að leggja í heimsiglingu til Vestmanneya.

Breytingarnar fólu m.a í sér 7,2 metra lengingu en Huginn VE 55 var smíðaður árið 2001 í Chile. 

Huginn er vinnsluskip og fjölveiðiskip sem fiskar bæði í nót og flottroll. 

Þessar myndir tók Páll Guðmundsson framkvæmdarstjóri Hugins ehf.

2411. Huginn VE 55. © Páll Guðmundsson 2018.

 

2411. Huginn VE 55. © Páll Guðmundsson 2018.

 

2411. Huginn VE 55. © Páll Guðmundsson 2018.

08.11.2018 18:12

Grímsnes GK 555

Hólmgeir Austfjörð tók þessa mynd þegar netabáturinn Grímsnes GK 555 fór frá Eyjum í dag.

89. Grímnses GK 555 ex BA 555. © Hólmgeir Austfjörð 2018.

07.11.2018 18:41

Meira af Seif

Ein mynd til viðbótar af dráttarbátnum Seif á Skjálfandaflóa.

2955. Seifur. © Hafþór Hreiðarsson 2018.

 

06.11.2018 21:25

Kristbjörg ÞH 44 ex Kristjón Jónsson SH 77

Síðasta myndin úr rammanum hans afa er af Kristbjörgu ÞH 44 sem upphaflega hét Kristjón Jónsson SH 77. Smíðaður í Skipavík fyrir Korra h/f í Ólafsví árið 1967 en keyptur til Húsavíkur í febrúar 1969. Kaupendur voru Olgeir Sigurgeirsson og synir hans Sigurður og Hreiðar. Hlutafélagið Korri h/f var keypt og báturinn fékk nafnið Kristbjörg ÞH 44. Þegar ný Kristbjörg kom 1975 fékk þessi nafnið Kristbjörg II ÞH 244. 

Ljósmyndina tók Pétur Jónasson ljósmyndari á Húsavík en þarna var Kristbjörgin með 47 tonn af þorski.

1053. Kristbjörg ÞH 44 ex Kristjón Jónsson SH. © Úr safni HH.

 

06.11.2018 21:10

Kristbjörg ÞH 44 ex Hallsteinn EA 130

Hér kemur sú næsta úr rammanum hans afa en hún sýnir Kristbjörgu ÞH 44. Báturinn var smíðaður í Danmörku 1934 og hét upphaflega Ægir GK 8 og var úr Garðinum. Síðar hét hann Hersteinn ÁR, Hersteinn RE, Hallsteinn EA og loks Kristbjörg ÞH 44 árið 1963.  Skálabrekkufeðgar gera hann út til ársins 1970 að hann er seldur til Suðurnesja. Þar heldur hann nafni sínu en verður GK 404 og endar ævi sína, ef hægt er að tala um ævi báta, þann 13 nóvember 1971 þegar hann strandaði á Stafnesi og eyðilagðist.

Án þess að fullyrða það tel ég að Pétur Jónasson ljósmyndari á Húsavík hafi tekið myndina.

541. Kristbjörg ÞH 44 ex Hallsteinn EA. © Úr safni HH.

06.11.2018 20:37

Njörður ÞH 44

Hér kemur fyrsta myndin af þrem sem héngu saman í ramma uppi á vegg hjá afa mínum, Olgeir Sigurgeirssyni.

Hún sýnir fyrsta bát þeirra Skálabrekkufeðga við bryggju á Húsavík. Njörð ÞH 44, sem þeir keyptu af Sigurbirni Sigurjónssyni ofl. í marsmánuði 1961. Á dekki Njarðar eru bræðurnir Sigurður og Hreiðar Olgeirssynir ásamt yngri bróður.

Njörður var smíðaður á Akureyri árið 1925 af Antoni Jónssyni skipasmið. Báturinn var 10 brl. að stærð og hét upphaflega Reynir EA 434.

Á vef Árna Björns Árnasonar segir að báturinn hafi verið smíðaður fyrir Jón Kristjánsson, Akureyri sem átti bátinn í fimm ár.

Þar segir jafnframt: 

Bátur þessi gekk á milli fjölda eiganda og bar ein sjö nöfn og sum oftar en einu sinni en með mismunandi einkennisstöfum. Þar sem gögnum ber ekki alfarið saman um á hvaða árum eignaskipti á bátnum áttu sér stað verður látið nægja að geta nafna hans í tímaröð. 

Reynir ÍS-504, Flateyri. 
Magnús RE-80, Reykjavík. 
Sæfari BA-131, Flateyri og Patreksfirði.  
Sægeir GK-308, Keflavík. 
Sægeir KE-23, Keflavík. 
Njörður NS-207, Hánefsstöðum. 
Njörður ÞH-44, Húsavík. 
Njörður EA-108, Akureyri. 
Kolbeinsey EA-108, Akureyri. 
Straumnes RE-108, Reykjavík. 
Straumnes GK. Grindavík. 

Kunnastur mun báturinn vera á Eyjafjarðarsvæðinu sem Njörður EA-108 og þá annars vegar í eigu Árna Ólafssonar, Akureyri og hinsvegar í eigu Guðmundar Haraldssonar, Akureyri. 
Seinustu árin var báturinn notaður sem vinnubátur í Grindavík. 

Báturinn hét Straumnes GK. er hann rak upp á Vatnsleysuströnd og var dæmdur ónýtur og tekinn af skrá 3. september 1985.

 

699. Njörður ÞH 44 ex Njörður NS. © Úr safni HH.

05.11.2018 20:46

Wilson Narvik á Húsavík

Hér liggur Wilson Narvik við Bökugarðinn en skipið kom með trjákurl til PCC á Bakka um helgina. Eitthvað gekk illa að hemja skipið við garðinn og fór það um tíma að Norðurgarðinum skilst mér en ég var ekki heima til að fylgjast með þessu.

Skipið var fært aftur að Bökugarðinum í gær og naut við það aðstoðar dráttarbátsins Seifs sem kom frá Akureyri.

Wilson Narvik er 6,118 GT að stærð smíðað árið 2011. Siglir undir fána Möltu með heimahöfn í Valletta.

Wilson Narvik. © Hafþór Hreiðarsson 2018.

05.11.2018 18:33

Seifur á Húsavík

Hér leggur dráttarbáturinn Seifur úr höfn á Húsavík en hann kom um helgina til aðstoðar þegar færa þurfti flutningaskip á milli viðlegukanta.

Seifur er í eigu Hafnarsamlags Norðurlands og heimahöfnin er á Akureyri.

2955. Seifur. © Hafþór Hreiðarsson 2018.
Flettingar í dag: 986
Gestir í dag: 224
Flettingar í gær: 2063
Gestir í gær: 236
Samtals flettingar: 9110429
Samtals gestir: 1974476
Tölur uppfærðar: 20.4.2019 21:02:46
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is