Ég tók svo margar myndir af skonnortunni Opal í siglingunni um daginn að ég verð að setja fleiri inn. Reyndar leiðist mér það ekki enda flott skip þarna á ferðinni, og knúið áfram af rafmagni.

2851. Opal. © Hafþór Hreiðarsson 2015.

Það fækkaði um einn í húsvíska flotanum um helgina en sem betur fer fór hann ekki langt. Hjalti Hálfdánarson (Auðrún ehf.) seldi sem sagt Borgina ÞH til Helgu ÞH ehf. sem Valgarður Sigurðsson stendur að og heimahöfn Kópasker. Fór sl. laugardag ti Bakkafjarðar þar sem hún verður gerð út það sem eftir lifir strandveiðitímabilsins. Mun heita Helga Sæm ÞH.

2494. Borgin ÞH 70 ex Garðar ÍS. © Hafþór Hreiðarsson 2015.

Fékk þessa mynd senda af makrílmiðunum í kvöld. Hún sýnir Venus NS á toginu og myndina tók Gundi á Frosta.

2882. Venus NS 150. © Gundi 2015.

Jaki heitir hann þessi sem kom inn til Siglufjarðar þegar ég var það fyrir helgi. EA 452 og með heimahöfn á Akureyri. Útgerðin heitir Þorbhjörg ehf. en hvað báturinn hét áður er ekki gott að segja. Veit hann hét Eyborg en hefur sennilega borið eitthvað í millitíðinni. Gæti verið Vonin.

6116. Jaki EA 452 ex Eyborg. © Hafþór Hreiðarsson 2015.

Júlía Blíða heitir þessi sem smíðaður var á Stokkseyri árið 1994 og skutlengt fjórum árum síðar. Þarna er hann að koma inn til Siglufjarðar sem er heimahöfn bátsins sem Reynir Karlsson á og gerir út.

2185. Júlía Blíða SI 173 ex Blíða RE. © Hafþór Hreiðarsson 2015.

Hér siglir Petrea frá Hauganesi blíðlega inn til hafnar á Siglufirði þar sem báturinn var smíðaður 1985. Hét upphaflega Ingeborg SI og síðar EA. Eigandi og útgerðarmaður Gunnar Anton Jóhannsson.

6677. Petrea EA 24 ex Ingeborg EA. © Hafþór Hreiðarsson 2015.

Strandveiðibáturinn Víðir ÞH 210 kemur að landi á Siglufirði í fyrradag. Nokkuð langt síðan ég myndaði bát með þessu nafni og númeri síðast en sá stóð uppi í Sandgerðisbótinni á Akureyri.  Þessi sem hér birtist var smíðaður á Stokkseyri 1992 og er í eigu Víðis ehf. á Grenivík.

2174. Víðir ÞH 210 ex Einar SH. © Hafþór Hreiðarsson 2015.

Strandveiðibáturinn Víðir EA 423 frá Akureyri kemur hér að landi á Siglufirði í fyrradag, Hann er af gerðinni Sómi 870 og útgerðaraðili er Brúin ehf.

Smíðaár Víðis er 2014.

7758. Víðir EA 423. © Hafþór Hreiðarsson 2015.

Dalborg EA 317 að siglir inn að leguplássi sínu eftir löndun á Siglufirði í fyrradag. Þennan bát þekkjum við Húsvíkingar vel, hét lengi vel Ásgeir ÞH 198 en þar áður Kristján EA 178.  Smíðaður af Baldri á Hlíðarenda 1987 og lengdur 2004. Útgerðaraðili er Björn Snorrason á Dalvík.

1790. Dalborg EA 317 ex Ásgeir ÞH. © Hafþór Hreiðarsson 2015.

Sómabáturinn Sveini EA frá Dalvík á hraðsiglingu til hafnar á Siglufirði í fyrradag. Útgerðaraðili er Gunnþór E. Sveinbjörnsson. Sveini var smíðaður 1997 og lengdur 2002. Hét áður Lúkas. ÍS ef ég man rétt.

7439. Sveini EA 173 ex Lúkas. © Hafþór Hreiðarsson 2015.

Edda SI 200 kemur að landi á Siglufirði í fyrradag. Smíðaður hjá Viksund í Noregi 1987 og hét upphaflega Auðbjörn ÍS. Hefur verið breytt talsvert eins og ég hef áður sýnt hér á síðunni.

1888. Edda SI 200 ex Auðbjörn ÍS. © Hafþór Hreiðarsson 2015.

Frystitogari FISK Seafood Arnar HU á makrílmiðunum í fyrrakvöld. Arnar var smíðaður árið 1986 í Tomrefjord, Noregi. Áður en Arnar kom til Íslands var hann gerður út undir nöfnunum Neptun og Andreas í Hvannasundi. Arnar var keyptur um áramótin 1995-1996 frá Rússlandi )fisk.is)

2265. Arnar HU 1 ex Neptune. © Gundi 2015.

Handfærabáturinn Gústi Guðna SI kemur að landi í fyrradag. Smíðaður 2013 hjá Siglufjarðar-Seig og samkvæmt vef Fiskistofu er eigandi F-610 ehf.  Báturinn virðist hafa algjörlega farið fram hjá þeim skipaskrám sem ég leita mest uppl. í en oftar en ekki gagnast ekki.

7768. Gústi Guðna SI 150. © Hafþór Hreiðarsson 2015.

Í vetur birti ég mynd af grásleppubátnum Degi SI en nú er það strandveiðibáturinn Dagur SI sem lá fyrir linsunni. Þetta er einn og sami báturinn sem ég myndaði í gær á Siglufirði. Þessi bátur hét að mig minnir Mímir BA í upphafi en hann var smíðaður á Akranesi 2001.

2471. Dagur SI 100 ex Otur SI. © Hafþór Hreiðarsson 2015.

Hvalaskoðunarbáturinn Máni lætur úr höfn á Dalvík í gær. Upphaflega Ásbjörg ST, síðasti eikarbáturinn sem Skipavík smíðaði og var afhentur 1977. 

1487. Máni ex Númi. © Hafþór Hreiðarsson 2015.