"Halldór Sigurðsson verður áfram gulur og gerður út frá Ísafirði"

Eftirfarandi frétt birtist á bb.is en í henni segir að Útgerðarfyrirtækið Valþjófur ehf. hafi keypt bátinn Halldór Sigurðsson ÍS með aflaheimildum.

Valþjófur er í eigu Gunnars Torfasonar og Ólafs Jens Daðasonar. Báturinn er keyptur af útgerðinni Kili ehf. sem er í eigu feðganna Konráðs Eggertssonar og Guðmundar Konráðssonar. Gunnar Torfason segir að auk bátsins og fylgi með í kaupunum 5 prósenta aflaheimildir í innfjarðarrækju í Ísafjarðardjúpi, 100 prósenta hlutur í rækjuveiðum í norðanverðum Breiðafirði og hrefnuveiðileyfi. Valþjófur gerir út bátinn Eið ÍS á rækju í Djúpinu. „Eftir kaupin á þessum aflaheimildum erum við með 23 prósent af rækjunni í Djúpinu,“ segir Gunnar.

Horfurnar í Djúpinu eru góðar að mati hans. „Veiðistofninn mælist 1.800 tonn og kvótinn sem var gefinn út fyrir vertíðina er 860 tonn þannig að það er farið varlega. Við gerum væntingar til þess að næsta vertíð verði góð miðað við horfurnar núna og það er mjög mikilvægt fyrir rækjuverksmiðjuna Kampa að áframhald verði á veiðunum.“ Báturinn verður gerður út áfram og segir Gunnar hann vera í toppstandi og vel útbúinn. „Báturinn er Konráð til mikils sóma. Hann er eins og nýr þrátt fyrir að vera 40 ára gamall og vel útbúinn til rækjuveiða, netaveiða og áframeldisveiða á þorski. Halldór Sigurðsson verður áfram gulur og gerður út frá Ísafirði.“

Konráð er ein þekktasta hrefnuskytta landsins og segir Gunnar að báturinn fari á hrefnuveiðar næsta sumar. „Konni er gamalreynd hvalveiðiskytta og hann ætlar að fara með okkur næsta sumar. En hjá Valþjófi starfar Karl Kjartansson sem hefur einnig mikla reynslu af hrefnuveiðum.“ (bb.is)