Vil minna áhugasama að enn er nægur tími til að panta skipamyndadagalið fyrir næsta ár. Reikna með að það verði prentað í byrjun Desember. Panta má á korri@simnet.is

Nanna Ósk II ÞH 133 kom til heimahafnar á Raufarhöfn í gærkveldi en eins og áður hefur komið hér fram er báturinn nýsmíði frá Trefjum. Ég var á Raufarhöfn í dag ásamt Aðalsteini Árna Baldurssyni formanni Framsýnar-stéttarfélags og kíktum við um borð og óskuðum eigendum til hamingju með bátinn. Þeir bræður, Ragnar og Hólmgrímur, voru meira en til í að taka myndatökurúnt sem þeir og gerðu. Við Aðalsteinn tókum myndir og fórum svo að þakka fyrir og þá var okkur boðið um borð í annan rúnt semog við þáðum. Báturinn er mjög flottur að öllu leyti nema þá helst að það er Liverpoolmerki á bakborðshliðinni. þar hefði verið mun fallegra að hafa hið íðilfagra merki Newcastle United Annars ætla þeir bræður á línuveiðar inn skamms en þeir hafa einnig gert út á þorska- og grásleppunet á bátum sínum. Þeir eiga fyrir Nönnu Ósk ÞH 333 en hafa selt Andra ÞH.

Þá kemur önnur af Þinganesinu og ekkert meira um það að segja.

Sumt breytist ekki og einn af þeim sem sækja síðuna heim vill hafa hana í lit. Hringdi í mig blessaður og því ekkert annað í stöðunni en að henda inn annari mynd af Axel. Axel er í eigu Dregg Shipping ehf á Akureyri og er með heimahöfn í Valletta á Möltu. Skipið var að koma með brettatimbur fyrir CH-Pökkunarfélag til landsins.

Ekki var ég búinn að vinna lengi eftir að hafa myndað flutningaskipið Axel þegar ég leit út um gluggann og sá möstur og gálga við Bökugarðinn.Taldi mig þekkja hver væri þar á ferð og þar sem ég held að hann hafi aldrei áður komið til hafnar á Húsavík stökk ég af stað. Stal Hiluxfjallajeppa vinnufélaga míns og brunaði fram garðinn og náði að smella nokkrum myndum af Þinganesinu frá Hornafirði. Þinganesið er einn fjögurra togbáta sem smíðaðir voru í Aveiro í Portúgal fyrir íslendinga. Hann er sá eini þeirra sem ekki hefur verið breytt og er í eigu Skinneyjar-Þinganess á Hornafirði. Hvað hann var að gera hingað til Húsavíkur veit ég ekki en hann fór út aftur eftir stutt stopp.

Flutningaskipið Axel kom hingað til Húsavíkur í morgun og smellti ég af nokkrum myndum af því við komuna. Ekki var nú birtan til að hrópa húrra fyrir en þar sem komur flutningaskipa eru ekki algengar nú orðið henti ég frá mér byssunni og greip til myndavélarinnar. Til gamans breytti ég myndinni yfir í gamaldags svarthvíta og læt hana flakka svoleiðis.

Karlinn í brúnni er hér

Kristín ÞH landaði í heimahöfn á Húsavík í dag og þessa mynd tók ég af henni þegar hún lagði upp í næstu veiðiferð.

Hér sjáum við Narfa VE 108 á útleið frá Vestmannaeyjum, eða það held ég örugglega enda ekki hagvanur í eða við eyjar. Smíðaður í Elmshorni í Þýskalandi 1956 og hét Stígandi VE í upphafi. Myndina tók Sigmar Ingólfsson þá skipverji á Erni KE 13.

Seiglubáturinn Arnar SH frá Stykkishólmi hefur nú verið yfirbyggður. Ekki veit ég gjörla hvar það var gert en þetta kemur ágætlega út. Báturinn hét, eins og margir vita, áður Happasæll KE.