Hér koma myndir úr safni Þorgríms Aðalgeirssonar teknar á síldarmiðunum fyrir þó nokkru síðan. Þarna er Arney KE 50 í aðalhlutverki en myndirnar eru teknar úr Barðanum GK 375.

1014.Arney KE 50 ex Ársæll Sigurðsson GK 320. © Þ.A

1014.Arney KE 50 ex Ársæll Sigurðsson GK 320. © Þ.A

1014.Arney KE 50 ex Ársæll Sigurðsson GK 320. © Þ.A

Undanfarna daga hafa starfsmenn Norðursiglingar unnið að því að byggja yfir Garðar þar sem hann liggur við Suðurgarðinn í Húsavíkurhöfn. Hann er einn af síðustu bátunum af þessari stærð, á annað hundrað tonn, í íslenska flotanum sem byggt er yfir
Myndina tók ég í dag og eins og sjá má eru þeir langt komnir með að byggja yfir bátinn og skapar þetta mun betri aðbúnað fyrir þá sem vinna á dekki og á brú.

260.Garðar ex Sveinbjörn Jakobsson SH 10. © Hafþór Hreiðarsson 2009.

Hér birtist mynd úr safni Þorgríms Aðalgeirssonar af Arnþór EA 16 frá Árskógssandi þar sem hann er á síldveiðum. Þessi bátur hefur komið við sögu áður á síðunni en til upprifjunar er hann einn af Bozenburgarbátunum og það úr fyrra hollinu. Hann hét upphaflega Krossanes SU en heitir í dag Glófaxi VE 300.

968.Arnþór EA 16 ex Bergur VE 44. © Úr safni Þ.A

Þessar myndir sendi Þorgrímur Aðalgeirsson mér en þær sýna Bóba (Kristbjörn Árnason) við síldarlöndun á Húsavík upp úr 1980. Bóbi sem stjórnað hefur Sigurði VE (áður RE) um áratugaskeið var þarna að róa Lundey ÞH 350 sem hann átti til síldveiða með lagnet.

Bóbi um borð í gömlu Lundey. © Þ.A.

Hann hefur landað síldinni sitt og hvað, á Húsavík meira að segja. © Þ.A.

Þessar myndir tók Stefán Þorgeir Halldórsson á Þórshöfn í dag og sendi mér. Þær sýna þegar verið var að hífa Drauðni ÞH 108 á land en til stendur að farga honum. Draupnir hét upphaflega Hafrún EA 154 og var smíðaður á Akureyri fyrir hríseyinga. Síðar var hann rækjubátur í Súðavík en endaði síðan á Þórshöfn, með viðdvöl í Stykkishólmi að mig minnir.

1240.Draupnir ÞH 180 ex Hafrún ÍS 154. © Stefán Þorgeir Halldórsson © 2009.

1240.Draupnir ÞH 180 ex Hafrún ÍS 154. © Stefán Þorgeir Halldórsson 2009.

 

Þeir fiska sem róa segir einhversstaðar og þarna hefur sá guli orðið á vegi Óskars Karlssonar og hans manna á Guðrúnu Björgu ÞH 355. Ef það er hægt að tala um veg úti á sjó. Myndirnar sendi Þorgrímur Aðalgeirsson mér og sýna þær Guðrúnu Björgu koma að landi. Bátnum hefur verið gerð skil hér á síðunni en til upprifjunar hét hann upphaflega Sæborg ÞH 55, síðar Guðrún Björg ÞH 355 og að lokum Ársæll Sigurðsson HF 80. Hann sökk í innsiglingunni til Grindavíkur og mannbjörg varð.

1097.Guðrún Björg ÞH 355 ex Sæborg ÞH 55. © Þ.A.

1097.Guðrún Björg ÞH 355 ex Sæborg ÞH 55. © Þ.A.

Héðinn ÞH 57 er okkur skipaáhugamönnum á Húsavík hugleikinn og Þorgrímur Aðalgeirsson sendi mér þessa mynd úr safni sínu. Ekki man hann hver gaukaði að honum þesari mynd þannig að nafn ljósmyndarans er á huldu. Þarna er Héðinn að leggjast að bryggju á Húsavík vel hlaðinn og er þetta virkilega flott mynd.

1006.Héðinn ÞH 57. © Úr safni ÞA.

 

Hér sjáum við mynd Vigfúsar Markúsonar af rækjubátnum Val ÍS 420 á toginu. Valur sem í dag heitir Halldór Sigurðsson ÍS 14 hét upphaflega Margrét Þorvaldsdóttir ST 95 og var í eigu Jakobs Þorvaldssonar á Drangsnesi. Báturinn, sem mældist 30 brl. að stærð, var smíðaður á Ísafirði 1974. Í síðari hluta júlímánaðar 1977 kaupa þeir Þráinn Sigurðsson og Viktor Hjartarson í Vestmannaeyjum bátinn en það stóð ekki lengi því í byrjun ágúst er hann seldur aftur. Þá er það Álftfirðingur hf. á Súðavík sem kaupir hann og nefnir val ÍS 420 sem hann bar allt þar til hann fékk núverandi nafn. Valur ÍS var borðhækkaður um 60 cm. árið 1979 og mældist þá 41 brl. að stærð. Upphaflega var í honum 335 hestafla Caterpillar aðalvél en árið 2001 er sett í hann ný aðalvél sömu gerðar, en hestöflin orðin 365. Eftir sameiningar fyrirtækja við djúp keyptu feðgarnir Konráð Eggertsson og Guðmundur Konráðsson bátinn en ekki fann ég hvaða ár það var.

1403.Valur ÍS 420 ex Margrét Þorvaldsdóttir ST 95. © Vigfús Markússon.

Hér birtist mynd af einum Boizenburgaranum til, Hrafn Sveinbjarnarson GK 255 heitir hann þegar myndin var tekin á Vopnafirði 1983 eða 4. Í sdag heitir hann Saxhamar SH 50 og hefur saga hans komið hér fram áður.

1028.Hrafn Sveinbjarnarson GK 255. © Hreiðar Olgeirsson.

Hér er mynd Hreiðars Olgeirssonar frá komu Héðins ÞH 57 til heimahafnar á Húsavík árið 1966. Héðinn var smíðaður í Ulsteinskipasmiðjunni á Hareideyju skammt sunnan við Álasund í Noregi og töldu norðmenn hann þá vera fullkomnasta fiskiskip í heiminum.

Ég rakst á eftirfarandi texta á vafri mínu um netheima en þetta skrifaði Jón Ármann Héðinsson sem var framkvæmdarstjóri Hreifa hf. sem átti og gerði Héðin út:

Árið 1966 kom Héðinn ÞH 57 til Húsavíkur. Um borð voru sjókælingartæki. Þetta var í fyrsta sinn í sögunni sem fiskveiðiskip var með slíkan útbúnað og vakti heimsathygli þá. Útbúnaðurinn var frá "Kværner-brug" í Noregi. Jafnfram var undirþrýstingsdæla ("vacum"), sem tryggði óskemmdan afla úr nótinn og frá skipi í land. Auk þessa var Héðinn með tvær þverskrúfur, að framan og aftan. Ekkert skip í heiminum var þá með þennan útbúnað. Vegna þessa og fleiri atriða um borð var Héðinn valinn skip ársins 1966 af tímaritinu World Fishing og mynd af skipinu á forsíðu desemberheftisins.

1006.Héðinn ÞH 57. © Hreiðar Olgeirsson 1966.

Upp úr hádeginu í dag fór Ásborg BA 84 sem samkvæmt vef Fiskistofu heitir nú Tjaldur II ÞH 294 um hafnarsvæðið á Húsavík á dráttarvagni sem dregin var af MANbifreið Reynis í Brekku. Reynir sjálfur var undir stýri og var ferðinni heitið út á Húsavíkurhöfða að athafnasvæði Trésmiðjunnar Val. Þar ætlar Kristján Eggertsson skipasmiður að fara fyrir sínum mönnum en eitt og annað þarf að dytta að enda báturinn kominn til ára sinna.

Farið norður hafnarstéttina undir forystu Adda löggu...

...og hér fram hjá Þekkingsetri Þingeyinga. Skipasmíðar er þekking sem ekki má glatast..

...hér er beygjan tekin upp í Naustagilið, til hægri sést í bát sem nýlega kom til Húsavíkur..

...gömul og glæsileg hús og gamall bátur sem verður glæsilegur. © Hafþór 2009.

Þessi var á stundum kallaður "Skipið,, hér á Húsavík enda var hann um tíma stærsti bátur okkar húsvíkinga fyrir utan togarana. Kannski er ég búinn að birta þessa mynd áður en það gerir þá bara ekkert til. Myndina tók annar hvor okkar feðga á Breiðafirði en ég skýt á að kallinn hafi gert það, en kannski á mína vél. Þarna er Sigþór eins og hann leit út áður enn hann fór í breytingarnar í Þýskalandi árið 1987.

185.Sigþór ÞH 100 ex Sigurpáll GK 375. © Hreiðar Olgeirsson 1986.

Hér kemur ein gömul frá þeim tíma sem enn var gaman að fara á Grandann og munda vélina. Var í borginni um helgina og fór þarna niður eftir og þvílík hörmung. Steindautt helvíti. En á myndinni liggur gamla Aðalbjörgin RE 5 utan á gömlu Aðalbjörgu II RE 236 við verbúðarbryggjuna eða hvað hún nú heitir. Ég held að búið sé að gera Aðalbjörginni einhver skil hér á síðuni áður svo ég læt staðar numið hér.

265.Aðalbjörg RE 5 ex Aðalbjörg HU. © Hafþór Hreiðarsson.

Eldbakur EA 6 er búinn að vera staðsettur á Húsavík frá því snemmsumars en menn hér í bæ eru að brúka hann við tilraunir í kræklingarækt. Eldbakur hét áður Björn EA 221 en Brim keypti hann til að sinna þorskeldinu sáluga sem þeir voru með á Eyjafirði. Þessa mynd tók ég í október.

6996.Eldbakur EA 6 ex Björn EA 221. © Hafþór Hreiðarsson 2009.

Enn og aftur er það Sighvatur GK sem birtist hér og hér er hann eins og hann var áður en byggt var yfir efra þilfarið að aftan.

975.Sighvatur GK 57 ex Bjartur. © Hafþór Hreiðarsson.