Skipamyndir Hafþórs Hreiðarssonar

16.07.2018 10:04

Hjalti SI 12

Hjalti SI 12 sést hér á mynd Hannesar Baldvinssonar á Siglufirði en Hjalti var gerður út þaðan frá árinu 1945. Hjalti var talin ónýtur og tekinn af skrá í ársbyrjun 1979.

Fræðast má um Hjalta hér en hann var smíðaður á Akureyri 1916 af Antoni Jónssyni skipasmið og var upphaflega EA 360. Síðar var hann gerður út frá Grenivík og var TH 272, og að lokum SI 12 frá Siglufirði.

569. Hjalti SI 12 ex TH 272. © Hannes Baldvinsson Siglufirði.

12.07.2018 20:38

Þinganes ÁR 25

Jón Steinar tók þessa mynd af Þinganesinu koma til Grindavíkur fyrir skömmu. 

Eitt fjögurra systurskipa sem smíðuð voru á sínum tíma fyrir Íslendinga hjá Carnave Eir Navais Sa smíðastöðinni í Aveiro í Portúgal.

2040. Þinganes ÁR 25 ex SF. © Jón Steinar 2018.

11.07.2018 12:05

Anna SI 117

Anna SI 117 var smíðuð í Zaandam í Hollandi árið 1960 fyrir Þráinn Sigurðsson útgerðarmann á Siglufirði. Hannes Baldvinsson tók þessa mynd af Önnu sem var 150 brl. að stærð búin 500 hestafla Kromhout díesel vél. Anna var seld 28 maí 1970, Skrúðsbergi h/f á Fáskrúðsfirði, hélt nafninu en varð SU 3. Seld 14 mars 1974, Sverri h/f í Grindavík, hét áfram Anna en nú GK 79. 

Árið 1975 var sett ný 640 hestafla Samofa díesel vél í bátinn sem var síðan seld þann 6 mars 1978, Önnu h/f í Stykkishólmi, hét áfram Anna en nú SH 35. Í október 1979 kaupir Skagaberg s/f á Akranesi Önnu sem enn hélt nafni sínu en varð AK 56. 1980 var aftur skiptu vél og nú var sett niður 640 hestafla. Mitsubishi díesel vél. Í byrjun árs 1984 kaupir Rækjunes h/f í Stykkishólmi bátinn sem hélt nafninu en varð SH 122. 

Anna var endurmælt 26 febrúar 1985 og mældist þá 132 brl. að stærð. Báturinn var seldur 16 janúar 1990 Sigurbirni Hilmarssyni ofl. (ÓSk h/f) í Vestmannaeyjum og eftir að hafa borið nafnið Anna í 30 ár tæp fékk báturinn nýtt nafn, Freyr VE 700. Eyjavík h/f í Vestmannaeyjum kaupir bátinn í maílok 1991 og fékk hann þá nafnið Sigurvík VE 700. Selt 15 apríl 1994, Goðaborg h/f í Vestmannaeyjum, hét Stokksnes VE 700. Þessar heimildir eru úr íslensk skip en þar segir jafnframt að Stokksnesið hafi verið talið ónýtt og tekin af skrá 14 febrúar árið 1995. 

Svo var nú ekki því það var Stokksnes RE 123 og lá við bryggju hér á landi til ársins 2003 að það var selt erlendis og fór til veiða við Afr­íkustrendur fyr­ir hina nýju eig­end­ur. Og er enn á floti að ég held.

 

Í Morgunblaðinu 28. desember 1960 sagði svo frá komu Önnu SI 117 til heimahafnar á Siglufirði:

Í gærkvöldi kom hingað nýr vélbátur, Anna heitir sá SI 117. Er þetta 140 tonna skip smíðað í Hollandi, allt hið fallegasta vandaðasta til að sjá. Eigandi þess er hinn dugmikli útgerðarmaður hér í bænum, Þráinn Sigurðsson. Skipstjóri er Jón Guðjónsson.

Í vetur hefur Þráinn sem jafnframt rekur frystihús, gert út tvo báta, sinn eigin bát, Baldvin og bát er hann tók á leigu og Hringur heitir. Auk þess leggja

upp í frystihús Þráins bátarnir Hjalti og Viggó. Afli þessara báta hefur verið góður, og hefur af þessu skapazt mikil atvinna í frystihúsinu, þar sem 60—70 manns hafa unnið. Með komu hins nýja skips eykur Þráinn enn myndarlega atvinnurekstur sinn hér í bænum.

Bæjartogararnir hafa lítið aflað eins og aðrir togarar landsmanna og lítil vinna verið við frystihús SR. Mun stjórn S.R. nú hafa samþykkt að taka á leigu tvö fiskiskip til hráefnisöflunar og standa því vonir til að atvinna í frystihúsi S.R. aukist verulega.

7. Anna SI 117. © Hannes Baldvinsson Siglufirði.

11.07.2018 09:12

Ný Cleopatra 36 til Lófóten

Bátasmiðjan Trefjar í Hafnarfirði afgreiddi nú á dögunum nýjan Cleopatra bát til Napp ord-Lenangen í Tromsfylki í Noregi.

Kaupandi bátsins er Steinar Sandnes sem jafnframt verður skipstjóri á bátnum.

 

Báturinn hefur hlotið nafnið Vikberg.  Báturinn mælist 14 brúttótonn.  Vikberg er af gerðinni Cleopatra 36.

Aðalvél bátsins er af gerðinni FPT C13 650hp tengd ZF V-gír.  Báturinn er útbúinn fullkomnum siglingatækjum af gerðinni JRC.

Báturinn er einnig útbúin með tveimur vökvadrifnum hliðarskrúfum sem tengdar eru sjálfstýringu bátsins.  Báturinn er útbúinn til línuveiða.

Veiðibúnaður kemur frá Noregi. Öryggisbúnaður bátsins kemur frá Viking-björgunarbúnaði.

 

Rými er fyrir 15 stk. 380lítra kör í lest.  Fullkomin eldunaraðstaða auk borðsals er staðsett í brúnni.  Svefnpláss er fyrir þrjá í lúkar.  Salerni með sturtu er í lúkar. 

Báturinn hefur þegar hafið veiðar.

Vikberg N-210-F. © trefjar.is

 

10.07.2018 16:02

Sigurfari SH 105

Hér birtist mynd Hannesar Baldvinssonar af Sigurfara SH 105 sem hann tók á Siglufirði á síldarárunum.

Sigurfari hét upphaflega Gunnbjörn ÍS 18, smíðaður úr eik og furu í Svíþjóð árið 1929. Hann var 46. brl. að stærð búinn 90 hestafla Ellwe vél.

Eigendur voru Guðmundur Kr. Guðmundsson, Ingibjartur Jónsson, Arinbjörn Clausen, Guðmundur G. Sigurðsson og Pétur Njarðvík Ísafirði.

Samvinnufélag Ísfirðinga, ísafirði, var skráður eigandi í nóvember 1943. 1945 var sett í hann 120 hestafla Ruston díeselvél.

Í janúar 1956 var Gunnbjörn seldur til Grundarfjarðar og fékk þá það nafn sem hann ber á myndinni, Sigurfari SH 105. Kaupendur voru Karl Stefánsson og Hjálmar Gunnarsson í Grundarfirði.

1958 var sett í hann 200 hestafla Lister díeselvél (frá 1949). Báturinn var endurmældur 1961 og mældist þá 45 brl. að stærð. 1963 var enn og aftur skipt um aðalvél og nú kom sett í hann 220 hestafla Caterpillar.

Í desember 1968 voru skráðir eigendur Hjálmar Gunnarsson og Jenný Ásmundsdóttir í Grundarfirði.

Sigurfari SH 105 var tekinn af skipaskrá 18. ágúst 1981 en þá hafði hann legið í fjögur ár. (Heimild: íslensk skip)

745. Sigurfari SH 105 ex Gunnbjörn ÍS. © HB.

 

10.07.2018 15:44

Kvitungen

Selveiðarinn Kvitungen T-6-T frá Tromsö kom við í Reykjavík á dögunum á leið sinni til veiða við austurströnd Grænlands. Jón Steinar smellti þá mynd af þessum sextuga bát sem skráður er sem selveiðibátur.

Ætli hann sé þá ekki á selveiðum ?

LGPZ. Kvitungen T-6-T ex Polarfangst. © Jón Steinar 2018.

09.07.2018 18:18

Sæborg og Salka

Þær mættust í hafnarkjaftinum í dag Sæborg og Salka en þær eru nánast jafnaldra.

Sæborgin afhent frá Bátaverkstæði Gunnlaugs og Trausta á Akureyri 26. febrúar 1977.

Hét upphaflega Sæborg ÞH 55 og var 40 brl. að stærð. Mælist nú 36 BT.

Salka var afhent frá Skipasmíðastöðinni Dröfn í Hafnarfirði tæpum mánuði fyrr, eða 28 janúar. (Smíðaár mun samt vera 1976 samkvæmt skipaskrá)

Hét upphaflega Hafsúlan SH 7 og var þá 36 brl. að stærð. Mælist nú 35 BT.

1475. Sæborg - 1470. Salka. © Hafþór Hreiðarsson 2018.

09.07.2018 13:23

Víðir SU 175

Víðir SU 175 var smíðaður í Svíþjóð árið 1946 og mældist 91 brl. að stærð, búinn 215 hestafla Polar aðalvél.

Eigandi var Víðisútgerðin h/f á Eskifirði og var Víðir SU ávallt mikið aflaskip og vel til hafður. Skipt var um vél í honum árið 1953 og kom 360 hestafla Lister í stað þeirrar sem áður var.

Í janúarmánuði 1965 var Víðir seldur Guðjóni Ólafssyni í Vestmannaeyjum sem nefndi hann Ágústu VE 350.

Ekki varð sú útgerð löng því Ágústa VE 350 sökk þann 11. október sama ár um 27 sjm. suðaustur af Daltanga.

 

Tíminn sagði svo frá þann 12. október 1965:

Vélbáturinn Ágústa, VE 350,sökk í morgun á leið af síldarmiðunum til hafnar. Á bátnum voru ellefu menn og björguðust þeir allir. Geysimikill leki kom að bátnum og sökk hann hálftíma eftir að lekans varð vart.

Blaðamenn hittu Guðjón Ólafsson skipstjóra að máli á Reykjavíkurflugvelli um níuleytið í kvöld en þá kom hann og skipverjar hans þangað frá Egilsstöðum með Blikfaxa Flugfélags Íslands. 

Guðjón vildi sem minnst segja eins og venja er fyrr en sjódómur hefur fjallað um málið. Hann kvað þá hafa verið á innleið í morgun með um 700 mál síldar. Um klukkan 8 voru þeir 26—7 sjómílur suðaustur að austri frá Dalatanga. Þá varð skyndilega vart við mjög mikinn leka. Í fyrstu var reynt að dæla úr bátnum, en eftir tuttugu mínútur var því hætt, enda algerlega vonlaust að bjarga bátnum. Fóru skipverjar þá í tvo gúmbjörgunarbáta.

Áður hafði Guðjón haft samband við Friðrik Sigurðsson, sem var þarna skammt frá. Miðuðu skipverjar á Friðriki Ágústu út og héldu þegar til þeirra. Er skipverjar voru komnir í bátana fór Ágústa á hliðina á hálfri annarri mínútu og hálftíma eftir að lekans varð vart var báturinn sokkinn. Tuttugu mínútum eftir að skipverjar af Ágústu voru komnir í gúmbátana var þeim bjargað um borð í Friðrik Sigurðsson, sem hélt síðan með þá til Seyðisfjarðar.

Ágústa var áður þekkt undir nafninu Víðir SU, sem var mikið aflaskip í eigu Sigurðar Magnússonar á Eskifirði, en fyrir stuttu keypti Guðjón skipið af Sigurði.

Ágústa var komin með um 25 þúsund mál og tunnur á vertíðinni í sumar.

880. Víðir SU 175. © Hannes Baldvinsson.

06.07.2018 17:25

Sjávarborg GK 60

Sjávarborg GK 60 kemur að landi í Reykjavík um árið með loðnufarm.  Skrokkur skipsins var smíðaður í Póllandi en skipið fullklárað á Íslandi og afhent frá Slippstöðinni í janúar 1981. Kaupandinn var  Sjávarborg hf. í Sandgerði.

Í Víkurfréttum sagði frá kaupum á Sjávarborginni GK og Sigurpáli GK 375 til Sandgerðis þann 28. janúar 1982:

Nú í upphafi vertíðar bætast tveir stálbátar í flota Sandgerðinga. Er annars vegar um að ræða kaup á fyrsta skuttogara íslendinga og hins vegar Flakkaranum svonefnda. margumræddi, sem raunar hefur á pappírum heitið Þórunn hyrna, og Slippstöðin á Akureyri hefur átt á lager um nokkurn tíma, hefur eins og fram kom í síðasta blaði verið seldur Sjávarborg hf. i Sandgerði. Hefur skipið nú fengið nafnið Sjávarborg GK 60 og fer væntanlega til netaveiða á næstu dögum. 

En hvers vegna hefur skipið gengið undir nafninu Flakkarinn? Ástæðan er sú að skrokkur skipsins var smíðaður í Póllandi fyrir Svía. Þaðan fór hann til Danmerkur, þar sem átti að innrétta hann og útbúa til veiða. Það varð ekki úr og Slippstöðin festi kaup á skrokknum. Frá Danmörku var hann dreginn til Akraness þar sem hann var lengdur. 

Til Akureyrar kom hann 1978 og var unnið við skipið þegar önnur verkefni voru ekki fyrir hendi. Dróst smíðin því á langinn og var skipið því tíðum á flakki milli viðlegukanta á Akureyri. Margir sýndu áhuga á að kaupa skipið eftir að smíði lauk, en samningar gengu ekki fyrr en nú. 

Sjávarborg er 450 lesta stálskip og mjög vel búið tækjum, m.a. með 1800ha Wichmannvél. 

Sigurpáll GK er skip sem Rafn hf. hefur keypt til Sandgeröis. Skipið er 200 lesta stálskip smiðað í Noregi 1964 og er í raun fyrsti skuttogari íslendinga og hét í upphafi Siglfirðingur Sl.

Skip þetta var i eigu Hreiðars Bjarnasonar o.fl. í Njarðvik fyrir nokkrum árum og hét þá Bjarni Ásmundar ÞH.

Sjávarborg GK 60 var seld til Svíþjóðar 1993 eftir að útgerð þess missti það á nauðungaruppboði.

1586. Sjávarborg GK 60 ex Þórunn Hyrna EA. © Hafþór Hreiðarsson.

06.07.2018 10:15

Guðmundur Þór SU 121

Guðmundur Þór SU 121 var smíðaður í Trésmiðju Austurlands hf. á Fáskrúðsfirði 1973.

Síðar bar hann nöfnin Fiskanes NS 13, Fiskanes NS 37 og aftur Guðmundur Þór SU 121. Síðan Sigurbára VE 249, Njörður EA 208, Haukur EA 208 og Haukur SF 208.

Haukur SF 208 sökk 11. apríl 1997, mannbjörg varð.

Báturinn var 17 brl. að stærð en hans helst mál voru þessi: lengd 13,89 m., breidd 3,74 m. og dýpt 1,61m. 

 

Myndina tók ég á Þjóðhátíð í Vestmannaeyjum 1983 og er það Hörður vinur minn Harðarson sem er fyrirsætan á myndinni.

 

Í Morgunblaðinu 15. júní 1973 sagði svo frá:

 

Frá Trésmiðju Austurlands Fáskrúðsfirði, voru afhentir tveir 15 lesta frambyggðir eikarbátar sl. laugardag. Bátar þessir eru báðir byggðir eftir sömu teikningu. Teikninguna af þeim gerði

Sigurður Einarsson í Reykjavík.

Eigandi annars bátsins er Friðrik Stefánsson, Fáskrúðsfirði, og hlaut hans bátur nafnið Stefán Guðfinnur SU 78. Eigandi hins bátsins er Gylfi Eiðsson, Eskifirði, og hlaut bátur hans nafnið

Guðmundur Þór SU 121. 

Báðir bátarnir fara á handfæraveiðar.

1312. Guðmundur Þór SU 121 ex Fiskanes NS. © Hafþór Hreiðarsson 1983.

05.07.2018 23:20

Særún EA 251

Hér er Særún EA 251 frá Árskógssandi að draga netin, að ég held á Breiðafirði á vetrarvertíð 1982 frekar en 3. En myndin gæti alveg eins verið tekið hér fyrir norðan en pabbi tók hana held ég frekar en ég.

Særún hét upphaflega Gullfaxi SH 125 frá Grundarfirði.

Í 3. tbl. Ægis 1979 segir svo frá:

8. febrúar s.l. afhenti Skipasmíðastöðin Skipavík h.f. í Stykkishólmi nýtt 73 rúmlesta stálfiskiskip, sem er nýsmíði nr. 19 hjá stöðinni og hlaut skipið nafnið Gullfaxi SH 125. Smíði

skipsins var með þeim hætti að smíði á skipsskrokki og yfirbyggingu fór fram hjá Dráttarbrautinni h.f. í Neskaupsstað, en síðan var skipið dregið til Stykkishólms, þar sem lokið var við skipið, þ.e. smíði innréttinga, niðursetningu á véla- og tœkjabúnaði o.fl.

Eigandi skipsins er Kristinn Arnberg Sigurðsson Grundarfirði og er hann jafnframt skipstjóri á skipinu.

Gunnar Jónasson í Garðabæ kaupir bátinn 1980. 1981 er hann seldur norður á Árskógssand, til feðganna Konráðs Sigurðssonar, Gunnlaugs Konráðssonar og Sigurðar Konráðssonar og nefndu þeir bátinn Særúnu EA 251. Seldur til Patreksfjarðar síðla árs 1992 þar sem hann fékk nafnið Brimnes BA 800. Skutlengdur í Slippstöðinni á Akureyri.

Um mitt ár2016 fær báturinn nafnið Steinbjörg BA 273 og í lok sama árs verður hann Þristur BA 36 en það nafn ber hann í dag.

1527. Særún EA 251 ex Gullfaxi SH. © Hreiðar Olgeirsson 1982.

05.07.2018 15:56

Guðmundur Kristinn SU 404

Hér kemur mynd af Guðmundi Kristni SU 404 frá Fáskrúðsfirði tekin á fyrri hluta níunda áratugarins. Held að Þorgeir nokkur Baldursson hafi tekið hana og sent mér fyrir langa löngu. Ef ekki þá tók ég hana eða kanski pabbi.

Guðmundur Kristinn var mikið aflaskip á síldinni á þessum árum undir skipstjórn Ingva Rafns Albertssonar.

Upphaflega hét þessi bátur Seley SU 10 og þegar hann kom til heimahafnar í endaðan febrúar 1966 var hann stærsta fiskiskip í flota Eskfirðinga.

 

Eftirfarandi frétt um komu Seleyjar til heimahafnar birtist í Austurlandi 4. mars 1966:

Um síðustu helgi kom til Eskifjarðar nýtt og glæsilegt fiskiskip, Seley SU 10, eign Kristmanns Jónssonar útgerðarmanns, annað skip hans með þessu nafni.

Seley er 285 lestir að stærð og er því stærsta skipið í flota Eskfirðinga.

Skipið, sem er stálskip, er smíðað í Flekkefjord í Noregi og búið 660 ha. Lister Blackstone vél.

 Ganghraði reyndist 11 sjómílur. Þá er skipið búið öllum fullkomnustu fiskileitar- og öryggistækj- um svo og nýrri gerð af sjálf- stýringu. 

Kælibúnaður er í lest og stampageymslu.  Einnig eru frysti- og kæligeymslur fyrir matvæíi. Nótarblökk er af stærstu gerð. 

Skipstjóri á Seley er Gísli Jónasson, frá Vestmannaeyjum, stýrimaður er Þórir Björnsson, Eskifirði og 1. vélstjóri Rafn Ingvarsson, Eskifirði. 

Seley er farin á veiðar með loðnu- og þorsknót. 

Í viðtali við blaðið kvaðst eigandinn, Kristmann Jónsson, vera mjög ánægður með bátinn, hann hefði reynzt hið bezta á heimsiglingunni. Þá lét hann einnig mjög vel af skiptum sínum við skipasmíðastöðina í Flekkefjord. 

 

1972 var Seley seld Græði hf. í Bolungarvík og fékk hún nafnið Flosi ÍS 15. Selt Pólarsíld h/f á Fáskrúðsfirði og Magnúsi Þorvaldssyni á Stöðvarfirði í árslok 1976 og fékk hann þá nafnið Guðmundur Kristinn SU 404.

Síðar fékk hann nafnið Kristján RE 110 áður en hann fékk sitt síðasta nafn á íslenskri skipaskrá en það var Eldhamar GK 13.

Seldur til Króatíu árið 2007 þar sem hann hefur síðan verið notaður í ferðaþjónustu.

1000. Guðmundur Kristinn SU 404 ex Flosi ÍS. © Þorgeir Baldursson.

05.07.2018 12:55

Lómur

Flutningaskipið Lómur er hér að sigla til hafnar á Húsavík í morgun.

Smíðaður 2001 og er 101 meter á lengd og 19 metrar á breidd. Mælist 4.454 GT að stærð.

Siglir undir fána Gibraltar og hét áður Ruby.

Upphaflega hét skipið Frisia, síðan Apolo, Anja, Ruby og loks Lómur.

Lomur ex Ruby. © Hafþór Hreiðarsson 2018.

04.07.2018 21:12

Sighvatur farinn vestur

Línuskipið Sighvatur GK 57 lét úr höfn í Grindavík um hádegisbil í dag og er förinni heitið vestur á Ísafjörð.

Þar mun allur búnaður og tæki á millidekkið settur niður en reiknað er með að Sighvatur fari á veiðar í ágúst.

Jón Steinar var á vaktinni og sendi þessar myndir er Sighvatur lét úr höfn.

Þá fylgir ein mynd af þrem línuskipum Vísis við bryggju á dögunum.

1416. Sighvatur GK 57 ex Sævík GK. © Jón Steinar 2018.

 

1416. Sighvatur GK 57 ex Sævík GK. © Jón Steinar 2018.

 

1416. Sighvatur GK 57 ex Sævík GK. © Jón Steinar 2018.

 

Sighvatur GK 57- Páll Jónsson GK 7 - Jóhanna Gísladóttir GK 557. © JSS.

04.07.2018 10:36

Wilson Nice

Flutningaskipið Wilson Nice liggur nú í Húsavíkurhöfn þar sem uppskipun á trjábolum fyrir PCC á Bakka fer fram.

Wilson Nice er 123 metra langt og 17 metra breitt, smíðað árið 2010.

Siglir undir fána Möltu með heimahöfn í Valletta.

Wilson Nice. © Hafþór Hreiðarsson 2018.
Flettingar í dag: 1344
Gestir í dag: 237
Flettingar í gær: 1720
Gestir í gær: 399
Samtals flettingar: 8677501
Samtals gestir: 1908938
Tölur uppfærðar: 24.9.2018 06:35:00
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is