Skipamyndir Hafþórs Hreiðarssonar

16.10.2017 14:42

Hafsteinn

Hér er mynd sem sýnir Hafstein EA 262 koma til Húsavíkur í slipp. Hann var ekki með öllu ókunnur slippmönnum hér því hann hét áður Björg Jónsdóttir ÞH 321. Upphaflega Þorbjörn II GK 541 og síðar Gandí VE 171. Valeska EA 417 í lokin en þess má geta að skrokkur bátsins var rifinn í Noregi á dögunum en þangað var Valeska seld 1992.

263. Hafsteinn EA 262 ex Björg Jónsdóttir ÞH. © Hafþór Hreiðarsson.

15.10.2017 11:03

Stálvík

Hér er Stálvík SI 1 við bryggju á Siglufirði en hún var smíðuð hjá Stálvík hf. í Garðahreppi 1973. Hún var fyrsti skuttogarinn sem var smíðaður á Íslandi og var í eigu Þormóðs ramma hf. á Siglufirði.

Í frétt í Degi frá 19. september 1973 segir svo frá heimkomu Stálvíkur:

Togarinn Stálvík, sá fyrsti sem smíðaður er hér á landi, kom til heimahafnar, Siglufjarðar, fánum skrýddur á sunnudaginn og var tekið á móti honum og áhöfninni með viðhöfn. Hlutafélagið Þormóður rammi er eigandi skipsins, skipstjóri er Hjalti Björnsson. Skipið fór á veiðar í gær. Togarinn var smíðaður í Stálvík hf. í Garðahreppi, 314 lestir. Kostnaðarverð við smíði skipsins varð 148,8 millj. kr.

Stálvík bar sama nafn alla tíð og var í eigu Þormóðs ramma hf. og síðan Þormóðs ramma-Sæbergs hf. eftir að fyrirtækin sameinuðust. Stálvík var upphaflega 314 brl. að stærð en eftir lengingu um 6 metra 1986 mældist hún 364 brl.

Stálvík var seld til Danmerkur í brotajárn árið 2005 en henni hafði verið lagt haustið 2004. 

1326. Stálvík SI 1. © Hafþór Hreiðarsson.

 

15.10.2017 10:50

Hafborg

Hafborg EA 152 hefur verið að róa héðan frá Húsavík í haust en ég hef lítið myndað hana. Á eina og eina mynd af henni en ætli það sé ekki frekar spenningurinn yfir því að mynda nýu Hafborgina sem veldur áhugaleysinu. Sú er í smíðum í Danmörki og er væntanleg heim eftir áramótin að ég held.

En hér er ein sem ég tók á dögunum þegar Óli var að bíða eftir að komast að olíutanknum hér í Húsavíkurhöfn.

2323. Hafborg EA 152 ex Stapavík AK. © Hafþór Hreiðarsson 2017.

14.10.2017 23:03

Harpa

Jón Steinar tók þessa mynd í sumar af dragnótabátnum Hörpu HU 4 koma til hafnar á Hvammstanga. Hún var keypt til Hvammstanga 2008 og hét áður Álftafell SU 100.

Smíðaður á Seyðisfirði 1970 og hét upphaflega Skálavík SU 500. Síðar Skálavík ÞH 178 og Skálavík ÁR 185. Þá Faxavík GK 727, Sólberg SH 66, Þorsteinn SH 145, Egill Halldórsson SH 2 og Villi í Efstabæ BA 214. Því næst Álftafell og loks núverandi nafn. 

Báturinn var lengdur 1991 og mælist eftir það 62 brl. að stærð.

Í Degi þann 20. júní 1973 var frétt frá fréttaritara blaðsins í Þistilfirði og þar sagði m.a. þetta:

Nær nýr 50 tonna bátur er hingað kominn og byrjaður að sækja fisk á miðin. Heitir hann Skálavík og eigandinn samnefnt hlutafélag, en skipstjóri er Jón Stefánsson. Báturinn er hinn fríðasti. 

1126. Harpa HU 4 ex Álftafell SU. © Jón Steinar 2017.

14.10.2017 12:10

Boy Leslie

Hér er mynd sem ég rakst á í tölvunni og sýnir Boy Leslie frá Arendal í Noregi. Pabbi tók myndina á trébátafestvali í Risør um árið. 2007 var það og þá var þessi 24 metra bátur 96 ára. Hann var smíðaður 1911 hjá Sanders og co. í Galmton í Englandi sem sailing trawler, segltogari. 

Annars eru uppl. um hann á Fésbókarsíðu sem haldið er út um hann og þar er sagan sögð. Yfir aldargömul saga.

 

Boy Leslie ex Ekstrand. © Hreiðar Olgeirsson 2007.

13.10.2017 16:58

Þjóðminja­safn Íslands ósk­ar eft­ir skipa­smiðum eða söfn­um sem vilj­ug eru til að ganga til samn­inga um viðgerð og varðveislu tveggja skipa, sem eru í vörsl­um safns­ins.

Í til­kynn­ingu frá safn­inu seg­ir að reynsla síðustu ára hafi leitt í ljós að til þess að tryggja varðveislu gam­alla tré­skipa geti verið æski­legt að halda þeim sjó­fær­um og á floti.

Um er að ræða Norðurljósið ÍS 537, súðbyrðingur með þilfari sem smíðaður var af Sigmundi Falssyni árið 1939 og Snari ÞH 36, opinn vélbátur frá 1953 smíðaður af Aðalsteini Aðalsteinssyni.  

Ástand beggja kallar á viðgerð og því leitar safnið eftir því hvort áhugasamir skipasmiðir eða söfn væru reiðubúin að ganga til samninga um viðgerð og varðveislu þessara skipa. Það eru eindregin tilmæli að þeir sem hafa þekkingu, hæfni, áhuga og bolmagn á slíkum verkefnum setji sig í samband við Þjóðminjasafn Íslands við fyrsta hentugleika.

Vinsamlegast hringið eða sendið tölvupóst til Ágústs Ólafs Georgssonar s. 530 2294 eða agust@thjodminjasafn.is

5448. Snari ÞH 36. © Hafþór Hreiðarsson.

 

 

 

11.10.2017 14:47

Gnúpur

Frystitogarinn Gnúpur GK kemur að landi í Grindavík. Jón Steinar tók myndina. Smíðaður 1981 í Flekkefjord og hét Guðbjörg ÍS 46. Lengdur 1988 og í lok árs 1994 var hann keyptur til Grindavíkir og fékk núverandi nafn.

1579. Gnúpur GK 11 ex Guðbjörg ÍS. © Jón Steinar 2017.

09.10.2017 18:13

Stavfjord

Flutningaskipið Stavfjord kom til Húsavíkur í dag með efni til malbiksframkvæmda, eða það held ég. Skipið var smíðað 2005 og hét áður Hunzeborg. Siglir undir fána Hollands með heimahöfn í Delfzijl.

Stavfjord. © Hafþór Hreiðarsson 2017.

09.10.2017 14:52

Reval Viking

Eiríkur Sigurðsson skipstjóri á Reval Viking tók þessa mynd á dögunum af skipi sínu í höfn á Longyearbyen á Svalbarða.

Reval Viking EK-1202 ex Remøy Viking. © Eiríkur Sigurðsson 2017.

 

08.10.2017 10:51

Brettingur

Brettingur NS 50 á toginu en hann var einn Japanstogaranna svokölluðu sem smíðaðir voru fyrir Íslendinga í Japan á sínum tíma. Þeir voru smíðaðir á tveimur stöðum í Japan, sex þeirra í Muroran og fjórir í Niigata. Brettingur var smíðaður í Niigata og kom til heimahafnar á Vopnafirði í marsmánuði 1973.

Í frétt Morgublaðsins sagði svo frá:

Í DAG sigldi nýr skuttogari inn til Vopnafjarðar fánum skrýddur. 
Skipið er Brettingur NS 50,eign útgerðarfélagsins Tanga hf.
á Vopnafirði.
Brettingur er 490 smálesta skuttogari smíðaður í Japan. 
Skipið er 46 metrar á lengd og 9 1/2 metri á breidd.
Skipstjóri á Brettingi er Tryggvi Gunnarsson, fyrsti stýrimaður 
Sverrir Guðlaugsson og fyrsti vélstjóri Hermann Friðfinnisson. 
Tangi hf. átti áður Bretting og Kristján Valgeir, en seldi skipin 
til þess að komast yfir þennan nýja skuttogara. 
Framkvæmdastjóri Tanga hf.er Sigurjón Þorbergsson, en aðaleigandi 
Vopnafjarðarhreppur. Skipið fer á togveiðar eftir nokkra daga.
1279. Brettingur NS 50. © Sigtryggur Georgsson.

08.10.2017 01:11

Þorsteinn aftur

Hér er önnur mynd sem ég tók af Þorsteini GK 15 þegar hann var að landa á Húsavík. Þessi öldungur er enn að og var gerður út frá Suðurnesjum á síðustu vertíð.

926. Þorsteinn GK 15 ex EA. © Hafþór 1992.

08.10.2017 00:50

Þorsteinn

Hér er verið að klára löndun úr Þorsteini GK 15 á Húsavík og mig minnir að fiskverkun Korra hf. hafi tekið við aflanum. Árið er 1992.

 
 
926. Þorsteinn GK 15.  © Hafþór Hreiðarsson 1992.
 
 
 

 

07.10.2017 17:24

Björgvin

Björgvin EA 311 á toginu. Þessi Björgvin var smíðaður í Flekkefjord og afhentur Útgerðarfélagi Dalvíkinga hf. í janúar 1974. Kom til heimahafnar í fyrsta skipti laugardaginn 19. janúar samkvæmt frétt í Degi þann 24. janúar. Togarinn var seldur til Noregs þegar núverandi Björgvin EA 311, einnig smíðaður í Flekkefjord, kom í flotann 1988. 

19. janúar s.l. kom skuttogarinn Björgvin EA 311 til heimahafnar 
sinnar,Dalvíkur. Skipið er nr. 5 af 6 skuttogurum, sem Flekkefjord 
Slipp og Maskinfabrikk í Noregi smíðar fyrir íslendinga,
og er nýsmíði stöðvarinnar nr. 114.
Þeir skuttogarar, sem stöðin hefur afhent áður, auk Björgvins EA, 
eru Júlíus Geirmundsson ÍS, Guðbjartur ÍS,Bessi ÍS og 
Framnes I ÍS,og voru þeir afhentir í ofangreindri röð. 
Eigandi Björgvins EA er Útgerðarfélag Dalvíkinga h.f.

Þetta er úr Ægi og sjötti togarinn var Guðbjörg ÍS 46 sem kom til Ísafjarðar 20. mars 1094.

 

1355. Björgvin EA 311. © Sigtryggur Georgsson.

07.10.2017 11:43

Sandvík

Hér kemur mynd af Sandvík KE 25 sem ég fann ofan í skúffu. Sandvík hét upphaflega Dafgur ÞH 66 og var smíðaður 1968 hjá Skipasmíðastöð KEA fyrir þá Vilhjálm Sigtryggsson og Kristján Ásgeirsson á Þórshöfn á Langanesi.

Dagblaðið Dagur á Akureyri sagði svo frá sjósetningu hans 4. desember 1968:

FYRIR helgina var sjósettur á Akureyri nýr 26 tonna eikarbátur, 
smíðaður hjá Skipasmíðastöð KEA,teiknaður af Tryggva Gunnarssyni,
sem einnig stjórnaði verkinu. 
Vél bátsins er 220 hestafla Caterpiller.
Eigendur eru Vilhjálmur Sigtryggsson og Kristján Ásgeirsson,
Þórshöfn.
Sjómenn ljúka upp einum munni um vandaðan frágang í smíði bátsins. 
Blaðið óskar þessum nafna sínum og eigendum,hans allra heilla.                       

Á vef Árna Björns Árnasonar, aba.is, segir að báturinn hafi verið í eigu þessara manna í tvö ár. 

Frá Þórshöfn fór báturinn til Siglufjarðar 1970 þar sem hann hét Dagur SI-66, þá á Ólafsfjörð 1978 og hét þar Dagur ÓF-8. Næsta heimahöfn var í Keflavík 1980 þar sem báturinn hét Sandvík KE-25 síðan fór hann 1985 til Grindavíkur sem Sandvík GK-325. 

Að síðustu fór báturinn vestur á Ísafjörð 1995 og fékk þar nafnið Kolbrún ÍS-74.   

Báturinn hét Kolbrún ÍS-74 er hann steytti á skeri við Hrútey á Mjóafirði í Ísafjarðardjúpi 11. apríl 1996 og lagðist á hliðina. Bræður tveir, sem á bátnum voru, komust upp á síðu bátsins og biðu þar björgunar. Flutningabílstjóri, sem leið átti um um Mjóafjörð, varð mannanna var og gerði viðvart. Ungur piltur frá bænum Látrum reri á slysstað jafnframt því sem björgunarbátur frá Ísafirði og rækjubátur í Djúpinu voru sendir á staðinn. Björgunarbáturinn tók mennina um borð og flutti þá til Ísafjarðar. Tilraun var gerð til að bjarga bátnum af skerinu en þegar búið var að rétta hann að mestu leyti við þá rann hann út af skerinu og sökk. 

Báturinn var felldur út af skipaskrá 31 des 1996.

1073. Sandvík KE 25 ex Dagur ÓF. © Hafþór Hreiðarsson.

 

06.10.2017 15:19

Björgvin

Björgvin EA 311 lætur úr höfn á Dalvík í gær eftir löndun. Eins og komið hefur fram í fjölmiðlum fiskaði hann tæplega 1100 tonn í septembermánuði.

1937. Björgvin EA 311. © Haukur Sigtryggur 2017.

 

Flettingar í dag: 3225
Gestir í dag: 1317
Flettingar í gær: 4329
Gestir í gær: 2212
Samtals flettingar: 8521057
Samtals gestir: 1854316
Tölur uppfærðar: 22.7.2018 23:37:43
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is