Skipamyndir Hafþórs Hreiðarssonar

24.01.2018 17:16

Masilik

Jón Steinar tók þessa mynd af grænlenska línuskipinu Masilik GR-8-350 í Reykjavíkurhöfn á dögunum. Skipið hét áður Carisma Viking og er með heimahöfn í Sisimiut.

Smíðað í Kristiansund í Noregi 2001 og á sér eitt systurskip í Íslenska flotanum, Önnu EA 305.

Masilik, sem gert er út af Royal Greenland, hét upphaflega Avor Viking (2004) því næst Argos Helena (2009) og loks Carisma Viking til ársins 2016 er það fékk núverandi nafn.

Masilik G-8-350 ex Carisma Viking. © Jón Steinar 2018.

23.01.2018 20:03

Ægir Jóhannsson

Hér er Ægir Jóhannsson ÞH 212 að koma að landi í Sandgerði um árið.

Í Tímanum þann 15. júlí 1975 sagði svo frá:

Nýr bátur hefur verið afhentur frá Skipasmíðastöðinni Vör h/f á Akureyri og ber hann nafnið Ægir Jóhannsson ÞH-212.

Eigendurnir eru fimm ungir menn frá Grenivík.

Ægir Jóhannsson er 29 tonn að stærð, búinn öllum venjulegum siglingar.og fiskileitartækjum. Aðalvél er Volvo Penta 300 hestöfl.

Báturinn er teiknaður af Páli Hjartarsyni, en hann hefur teiknað alla báta Varar h/f.sem með Ægi Jóhannssyni eru orðnir sex talsins.

Skipstjóri á Ægi er Sævar Sigurðsson. 

1430. Ægir Jóhannsson ÞH 212. © Hafþór Hreiðarsson.

22.01.2018 15:49

Örfirisey farin aftur til veiða

Frystiogarinn Örfirisey RE er farinn aftur til veiða, nú í norsku lögsögunni, eftir óhapp sem varð í lok október sl. er skipið var að veiðum  í rússnesku lögsögunni í Barentshafi. Þá brotnaði skiptiteinn í skrúfu skipsins með þeim afleiðingum að draga varð Örfirisey til Svolvær í Norður-Noregi til viðgerðar. 

Frá þessu segir á heimasíðu HB Granda 20. janúar.

Að sögn Lofts Bjarna Gíslasonar, útgerðarstjóra frystiskipa HB Granda, þurfti að fá varahluti senda frá framleiðanda vegna bilunarinnar. Við blasti einnig einnig að skipið þyrfti að fara í hefðbundna klössun á árinu 2018 og því var ákveðið að klössunin færi fram samhliða viðgerðinni hjá Skarvik skipasmíðastöðinni í Svolvær.

,,Auk viðgerðarinnar á skrúfubúnaðnum var aðalvél og niðurfærslugír skipsins tekinn upp og því verki lauk nú í byrjun vikunnar. Örfirisey fór svo til veiða að nýju að kvöldi sl. miðvikudags og framundan er 40 daga veiðiferð. Ég reikna með því að togarinn komi heim að veiðiferð lokinnni og landi aflanum í Reykjavík,“ sagði Loftur Bjarni Gíslason. hbgrandi.is

ÖRFIRISEY BACK AT SEA

HB Grandi’s freezer trawler Örfirisey is back at sea in the Norwegian sector, following an incident while fishing in the Russian part of the Barents Sea in October last year.A control rod in the controllable pitch propeller failed, with the result that Örfirisey was towed to Svolvær in northern Norway for repairs.

According to the company’s freezer trawler operations manager Loftur Bjarni Gíslason, spare parts had to be sourced from the manufacturer before repairs could be carried out. With the prospect of the ship also being due for a scheduled maintenance layup in 2018, the decision was taken to carry out both the repair and scheduled maintenance at the Skarvik shipyard in Svolvær at the same time.

‘As well as the repairs to the propeller, the main engine and the reduction gear were both stripped down and checked, and that was complete at the beginning of the week. Örfirisey sailed on Wednesday and has a 40-day trip ahead. I expect the trawler to be back at the end of this trip to land its catch in Reykjavík,’ Loftur Bjarni Gíslason said.

2170. Örfirisey RE 4 ex Polarborg. © Hafþór Hreiðarsson 2004.

 

 

 

22.01.2018 15:22

Sandfell búið að fiska yfir 4000 tonn

Sandfell SU 75 hefur rótfiskað frá því Loðnuvinnslan hf. á Fáskrúðsfirði keypti bátinn.  

19 janúar var sagt frá því á heimasíðu fyrirtækisins að afli hans væri kominn í 4000 tonn:

Sandfellið kom að landi í dag með 10 tonn og þar með er heildarafli Sandfellsins, undir eignarhaldi Loðnuvinnslunnar, kominn í 4000 tonn.  Loðnuvinnslan festi kaup á Sandfellinu og hóf útgerð á því í gegn um dótturfyrirtækið Hjálmar, þann 6. Febrúar 2016. Vel hefur gengið að afla hjá Sandfellinu og þrátt fyrir tveggja mánaða verkfalla sjómanna í síðasta ári er aflinn kominn í 4000 tonn.  Örn Rafnsson skipstjóri á Sandfellinu var inntur eftir því hverju hann þakkaði þetta góða gengi og svaraði hann því til að það væru nokkrir samverkandi þættir; gott skipulag, góð útgerð, góð kvótastaða og góður fastur mannskapur um borð.  Og svo bætti hann því við að það þyrfti aldrei að stoppa því á Sandfellinu eru tvær áhafnir sem róa í tvær vikur í senn.  Þegar Örn var spurður að því hvort að það hefði verið markmið að fiska í kring um 2000 tonn á ári sagði hann: „markmiðið er alltaf að gera eins vel og hægt er“.

Aflinn sem Sandfell kom með að landi í dag er að megin uppistöðu þorskur sem fer til vinnslu í frystihúsi Loðnuvinnslunnar á Fáskrúðsfirði.

Að lokum er full ástæða til þess að óska áhafnarmeðlimun á Sandfellinu innilega til hamingju með áfangann og óska þeim áframhaldandi velgengni. lvn.is

 

 
2841. Sandfell SU 75 ex Óli á Stað GK. © Hafþór Hreiðarsson 2017.

21.01.2018 16:27

Bonacieux

Flutningaskipið Bonacieux kom til hafnar á Húsavík í gærkveldi. Þetta 86 metra langa og 12 metra breipa skip var byggt árið 2009 og siglir undir fána Gíbraltar. Farmur þess er trjábolir fyrir verskmiðju PCC á Bakka og er honum skipað upp við Bökugarðinn.

Bonacieux ex Leybucht. © Hafþór Hreiðarsson 2018.

21.01.2018 00:42

Hágangar

Hér liggja Hágangar tveir við bryggju á Vopnafirði. 

Frá komu þeirra til Vopnafjarðar sagði svo í Morgunblaðinu þann 9. mars 1994:

Hágangur I og Hágangur II, systurskip Úthafs hf., komu til Vopnafjarðar sl. laugardag. Skipin eru keypt frá Kanada og smíðuð 1973 og 1975. Þau eru 53 m á lengd og 12 m á breidd og kosta 18 milljónir kr. hvort hingað komin, með miklu magni varahluta og veiðarfæra. Skipin fara í lagfæringar og breytingar á Vopnafirði og til veiða utan 200 mílna landhelginnar að því loknu. Skipin eru skráð í Balize-City. Um 100 manns hafa sótt um skipspláss og verða skipin eingöngu mönnum Íslendingum.

Hágangur hét áður Cape Le Have og Hágangur II Cape Hunter.

Hágangur 1 og 2 í höfninni á Vopnafirði. © Hafþór Hreiðarsson.

20.01.2018 22:59

Sólfari

Þessa mynd af Sólfara AK 170 tók ég á Breiðafirði um árið. Sólfari hét upphaflega Arinbjörn RE 54 og var smíðaður á Akureyri 1971.

Dagur sagði svo frá þegar Arinbjörn var sjósettur þann 2. apríl 1971:

TVEIR nýir fiskibátar voru sjósettir í Slippstöðinni í gær í blíðskaparveðri að viðstöddu fjölda fólks. Bátar þessir hlutu nöfnin Arinbjörn RE 54 og Sigurbergur GK 212. Arinbjörn er smíðaður fyrir Sæfinn h.f. í Reykjavík og er hann 150 brúttólestir, en Sigurbergur er smíðaður fyrir Sigurberg h.f. í

Hafnarfirði og hann er 110 brúttólestir að stærð.

Kjölur var lagður að báðum bátunum í byrjun október sl. og hefur smíði þeirra gengið samkvæmt áætlun. Arinbjörn RE verður fullsmíðaður hjá Slippstöðinni.

Hann verður með 600 ha. Alphadísilvél, togvinda og línuvinda eru smíðaðar hjá Vélsmiðju Sigurðar Sveinbjörnssonar h.f. Auk þess verður báturinn með

kraftblökk.

Sigurbergur GK verður dreginn suður til Hafnarfjarðar, þar sem lokið verður smíði hans, í Skipasmíðastöðinni Dröfn h.f.

Báðir bátarnir verða búnir öllum helztu fiskileitartækjum og útbúnir fyrir línu-, neta- og togveiðar.

Sjósetningin í dag gekk eins og bezt verður á kosið, bátarnir runnu út á flóðinu laust eftir kl. 3, með örstuttu millibili.

Tveir dráttarbátar biðu þeirra fyrir utan. Veður var gott og fjöldi fólks viðstatt.  

 

Arinbjörn hét síðar Elías Steinsson VE 167, Fagurey SH 71, Sólfari AK 170, Lómur SH 177,  Lómur BA 257,  Jón Klemenz ÁR 313,  Trausti ÁR 313,  Hrausti ÁR 313, Látraröst ÍS 100, Látraröst GK 306, Sólfari RE 16 ogSólfari SU 16.

Afskráður og tekinn úr rekstri 23.05.2008. 

Í 12. tbl. Ægis 191 sagði:

Í apríl mánuði s.l. hljóp af stokkunum nýtt 149 brl. stálfiskiskip hjá Slippstöðinni h.f. á Akureyri og hlaut það nafnið Arinbjörn RE 54. Skipið er um 31 m. langt, 6.70 m. breitt og 3,35 m. djúpt. Það er útbúið til línu-, neta-, tog- og nótaveiða og í því eru öll fullkomnustu fiskleitar- og siglingatæki og má þar nefna 2 Kelvin Hughes radara 48 smál. og 68 smál., Simrad S. K. 3 asdic, Kelvin Hughes fisksjá, Kodan miðunarstöð og Kelvin dýptarmæli Aðalvélin er 660 hö Alpha, ljósavélar eru 2 af Mercedes Benz gerð 57 hö. hvor og stærð rafala 37 KW. Togvindan er smíðuð af Sigurði Sveinbjarnarsyni Garðahreppi (stærð 16 tonn). Kælibúnaður er í lestum og einnig í línu- og beitugeymslu. Vistarverur eru fyrir 12 manna áhöfn. Eigandi hins nýja skips er Sæfinnur h.f., Reykjavík, og óskar Ægir eiganda til hamingju með hinn nýja farkost. 

 

1156. Sólfari Ak 170 ex Fagurey SH. © Hafþór Hreiðarsson 1987.
 

20.01.2018 12:19

Haförn og Karólína

Hér koma myndir sem ég tók í vikunni þegar dragnótabáturinn Haförn ÞH 26 kom að landi á Húsavík. Í sama mund var línubáturinn Karólína ÞH 100 að leggja í róður og mættust bátarnir í innri höfninni.

1979. Haförn ÞH 26 ex Þorsteinn BA. © Hafþór Hreiðarsson 2018.

 

1979. Haförn ÞH 26 - 2760. Karólína ÞH 100. © Hafþór Hreiðarsson 2018.
 

20.01.2018 11:56

Hraunsvík

Hér er Hraunsvík GK 68 að koma til hafnar í Grindavík um miðjan níunda áratug síðustu aldar. Hraunsvík hét upphaflega Akurey SF 52 og var smíðuð í Danmörku 1956.

Svo sagði frá í Morgunblaðinu 12. apríl 1956:

Tveir nýir bátar komu til Hornafjarðar í gær. Eru þeir báðir af sömu gerð og stærð, 53 smálestir með 230 hestafla Dams-dísilvél. Þeir eru búnir öllum  nýtízku vélaútbúnaði og m. a. er sími í öllum vistarverum skipverja.

Bátarnir voru smíðaðir í Faaborg á Fjóni og heita Akurey og Helgi. Bjarni Runólfsson og Guðni Jóhannesson sigldu bátunum hingað til lands, en eigendur eru Tryggvi Sigjónsson og Ólafur Ruhólfsson. 

Bátarnir búast nú á vertíð. 

Þarna stendur að í bátunum hafi verið Dams dísilvélar en í Íslensk skip segir að í Akurey hafi verið Deutz.

Saga Akureyjar nær amk. til ársins 1988 þegar Samherji kaupir hana til að auka kvóta sinn.

Saga Helga SF 50 eru öllu styttri og sorglegri en báturinn fórst á Færeyjarbanka 1961. Af níu manna áhöfn björguðust tveir í gúmíbjörgunarbát og þaðan í skoska línuskipið Verbena frá Kirchhaldy (Íslensk skip).

Akurey hét eftirfarandi nöfnum: Akurey SF 52 til 1962. Rán SU 58 til 1967. Gissur ÁR 6 til 1970 og þá Hraunsvík GK 68.

727. Hraunsvík GK 68 ex Gissur ÁR. © Hafþór Hreiðarsson.

20.01.2018 00:18

Haukur

Hér liggur Haukur GK 134 við bryggju í Sandgerði og þegar þarna var komið var nýr Haukur búinn að leysa hann af hólmi. Ef ég man rétt.

Haukur hét upphaflega Framtíðin KE 4 á íslenskri skipaskrá.

Í 13. tbl. Ægis 1974 sagði m.a um komu þriggja togara til landsins:

17. apríl bættist skuttogari í flota Keflvíkinga, Framtíðin KE 4. Skuttogari þessi, sem áður bar nafnið Øksfjord, er keyptur frá Noregi en er byggður árið 1970 hjá A/S Storviks Mek. Verksted Kristiansand, nýbygging nr. 37.

Framtíðin KE er sömu gerðar og Dagstjarnan KE, svonefnd R-155 A gerð. Þess má geta, að Stálvík h.f. Garðahreppi hefur byggt einn skuttogara eftir þessari teikningu frá „Storviks", Stálvík SI 1 og fljótlega mun annar skuttog-ari af þessari gerð hlaupa af stokkunum hjá Stálvík h.f.

Framtíðin KE er í eigu Fiskmiðlunar Suðurnesja h. f., en aðalhluthafar fyrirtækisins eru Hraðfrystihús Ólafs Lárusonar og Sjöstjarnan h.f. 

Togarinn hét Øksfjord í upphafi en fær nafnið Framtíðin 1974 sem hann ber til ársins 1981 þegar Valbjörn hf. í Sandgerði kaupir hann. Þá fær nafnið sem hann ber á myndinni en er GK 25 þangað til útgerðin keypti Snoddið sem fær nafnið Haukur GK 25.  Hann verður GK 134 en heldur Hauksnafninu sem hann bar til ársins 1993. Þá fékk togarinn nafnið Chapoma og er skráður í Montevideo í Uruguay. Hann mun hafa verið skráður í Rússlandi áður en hann var skráður í Uruguay. 

1378. Haukur GK 134 ex GK 25. © Hafþór Hreiðarsson.

 

19.01.2018 16:09

Guðrún Þorkelsdóttir

Hér koma tvær myndir sem Sigfús Jónsson tók um árið af Guðrúnu Þorkelsdóttur SU 211 á loðnuveiðum. Smíðuð á Akranes 1969 og hét upphaflega Helga Guðmundsdóttir BA 77 frá Patreksfirði.

Seld til Eskifjarðar 1982 og eftirfarandi frétt birtist í Dagblaðinu-Vísi 3. mars það ár:

Aflaskipið Helga Guðmundsdóttir hefur verið selt til Eskifjarðar og fór afhending skipsins nýlega fram. Hinir nýju eigendur eru Hraðfrystihús Eskifjarðar hf., sem á 75% og Ísak Valdimarsson, sem á 25%.

Þessir tveir aðilar hafa stofnað hlutafélag, sem rekur skipið. Það heitir Hólmaborg hf. 

Skipið heitir nú Guðrún Þorkelsdóttir SU 211. Það er nefnt eftir móður Aðalsteins Jónssonar útgerðarmanns, Alla ríka.

Guðrún Þorkelsdóttir SU er nú á netaveiðum, en skipstjóri er aflaklóin Ísak Valdimarsson.   

Skipið hét um tíma Seley ÞH 381 en heitir í dag Jóhanna Gísladóttir GK 7.

1076. Guðrún Þorkelsdóttir SU 211 ex Helga Guðmundsdóttir BA. © SJ.

 

1076. Guðrún Þorkelsdóttir SU 211 ex Helga Guðmundsdóttir BA. © SJ

18.01.2018 22:16

Í brúnni

Hér faðir minn, Hreiðar Olgeirsson, í brúarglugganum á Kristbjörgu ÞH 44, þeirri nr. 2 í röð fjögurra báta sem báru það nafn og númer. Sá bátur var sá fyrsti sem hann var með en þá hét hann Kristbjörg II ÞH 244.

Í dag eru tvö ár síðan hann lést en hann var sjómaður alla sína tíð, lengst af á fiskveiðum en frá árinu 2002 hjá Norðursiglingu þar sem hann sigldi með ferðamenn í hvalaskoðun. Utan ferðamannatímans vann hann við viðhalda báta og fasteigna Norðursiglingar.

Hreiðar Olgeirsson f. 26. maí 1943 d. 18. janúar 2016.

 

18.01.2018 17:38

Sigþór

Hér kemur mynd af Sigþóri ÞH 100 koma að bryggju á Húsavík. Þetta var tekið 1980 eða svo en skipið var keypt til Húsavíkur sumarið 1977.

Í Morgunblaðinu 7. júlí það ár sagði frá því að tveir nýir bátar hefðu verið keyptir til Húsavíkur það sumar. Annar var Þengill ÞH 114 en hinn var Sigþór og um hann sagði: 

 

Útgerðarfélagið Vísir, gamalt og þekkt útgerðarfélag, keypti 168 tonna bát, sem nú ber nafnið Sigþór, en hét áður Sigurpáll. Báturinn skemmdist í eldi, en hefur nú allur verið endurbyggður, og sett í hann öll ný leitar- og siglingartæki. Skipstjórar á honum verða Hórður Þórhallsson og Ingvar Hólmgeirsson, en þeir skiptast á skipstjórn og framkvæmdastjórn í landi. Vélstjóri er Dagbjartur Sigtryggsson. Sigþór mun bráðlega hefja línu- eða netaveiðar, en þessi útgerð verkar sjálf mest af sinum afla í salt.

Svan ÞH 100, sem Vísir átti, hefur Guðmundur A. Hólmgeirsson keypt og gerir hann bátinn út frá Húsavík áfram.

 

185. Sigþór ÞH 100 ex Sigurpáll GK. © Hafþór Hreiðarsson.

18.01.2018 15:32

Cape Race

Eiki myndaði þennan í Kaldfjørd þar sem hann var í siglingu með ferðamenn um hvalaslóðir. Man eftir myndum af honum þar sem hann lá í Reykjavík.

Smíðaður 1963 í skipasmíðastöðinni George T. Davie & Sons, Quebec sem togari en hér má lesa allt um skipið sem gert var út frá Nýfundnalandi.

Cape Race © Eiríkur Guðmundsson 2018.

18.01.2018 15:14

Frosti II

Hér er verið að byggja yfir Frosta II ÞH 220 frá Grenivík á Akureyri. Frosti, mikið aflaskip, var smíðaður í Hafnarfirði 1969. Hét upphaflega Arney SH 2 frá Stykkishólmi. Síðar Arney KE 50, tæpt ár hét hann Jón Sör ÞH 220 frá Húsavík, og þá Frosti II. Síðar var hann Eyrún frá Hrísey þar til hann var seldur til Noregs. 

 
Flettingar í dag: 1606
Gestir í dag: 548
Flettingar í gær: 1954
Gestir í gær: 540
Samtals flettingar: 8682156
Samtals gestir: 1910422
Tölur uppfærðar: 26.9.2018 11:22:44
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is