Skipamyndir Hafþórs Hreiðarssonar

25.02.2018 00:19

Börkur

Börkur NK 122 hét áður Malene S frá Noregi og var keyptur hingað til lands í febrúar árið 2014.

Á heimasíðu Síldarvinnslunnar segir að Börkur NK hafi verið smíðað í Tyrklandi árið 2012. Skipið er 3588 tonn að stærð, 80,30 metr­ar að lengd og 17 m á breidd. Aðal­vél þess er 4320 KW af gerðinni MAK, auk þess er skipið búið tveim­ur ljósa­vél­um 1760 KW og 515 KW. Skipið er búið svo­kölluðum „Diesel Electric“-búnaði sem þýðir að hægt er að keyra það ein­göngu með ljósa­vél og kúpla út aðal­vél­inni.

Skipið er búið öfl­ug­um hliðar­skrúf­um 960 KW og er vel búið til tog-  og nóta­veiða.  Burðargeta skips­ins er 2500 tonn, skipið er búið öfl­ug­um RSW kæli­búnaði eða 2 millj­ón Kcal með ammoní­ak-kælimiðli. 

2865. Börkur NK 122 ex Malene S. © Þorsteinn Eyfjörð Friðriksson 2018.

24.02.2018 13:59

Ek Star

Svafar myndaði Ek Star yfirgefa dokkina í Avonmouth en þetta 135 metra langa skip var smíðað 1999.

Það er 21 metrar á breidd og mælist 8,829 GT að stærð.

Siglir undir fána Noregs með heimahöfn í Arendal.

Ek Star. © Svafar Gestsson 2018.

 

24.02.2018 11:24

Kap

Kap VE 4 á loðnumiðunum í síðustu viku. Kap var byggð í Stettin í Póllandi 1987 og hét upphaflega Jón Finsson RE 506. Lengdur árið 2000.

Síðar Hersir ÁR 4, Kap VE 4, Faxi RE 9 og aftur Kap VE 4.

1742. Kap VE 4 ex Faxi RE. © Þorsteinn Eyfjörð Friðriksson 2018.

 

 

23.02.2018 23:58

Aðalsteinn Jónsson

Þorsteinn frændi minn Eyfjörð skipverji á Hákoni EA 148 sendi mér nokkrrar myndir sem hann tók á loðnumiðunum fyrir sunnan land í síðustu viku. Hér kemur sú fyrsta sem sýnir Aðalstein Jónsson SU 11 með nótina á síðunni.

Aðalsteinn Jónsson hét áður Libas og var stærsta uppsjávarskip þeirra Norðmanna og byggt árið 2004, er 94 metrar að lengd og tæpir 18 metrar á breidd.

Skipið var smíðað í Fitjar Mek. Verksted í Noregi og er geysilega vel útbúið til veiða en skipið er einnig hannað til hafrannsókna og þjónustu við olíuleit.

Aðalvél skipsins er Wartsila 12V32, 6000 kw eða 8100 hestöfl og burðargeta er um 2400 m3 í 12 kælitönkum.

2929. Aðalsteinn Jónsson SU 11 ex Libas. © Þorsteinn Eyfjörð 2018.

23.02.2018 09:33

Bro Designer

Danska flutningaskipið Bro designer lá fyrir linsunni hjá Svafari í Avonmouth í gær. Skipið er smíðað 2006, 145 metra langt, 23 metra breitt og mælis 11.344 GT að stærð.

Heimahöfn þess er kóngsins Kaupmannahöfn.

Bro Designer. © Svafar Gestsson 2018.

 

Bro Designer. © Svafar Gestsson 2018.

22.02.2018 16:44

Haförn

Haförn ÞH 26 kemur að landi í dag en hann er á dragnót og stundar veiðarnar í Skjálfandaflóa.

1979. Haförn ÞH 26 ex Þorsteinn BA. © Hafþór Hreiðarsson 2018.

22.02.2018 12:17

Keflvíkingur

Hér koma myndir af Keflvíkingi KE 100 og eins af bátnum undir þeim nöfnum sem það bar. Keflvíkingur KE 100, hét hann frá 1964 til 1994. Því næst Bergur Vigfús GK 53 til ársins 1999 þegar hann fær nafnið Marta Ágústsdóttir GK 31. 2012 fær hann nafnið Þórsnes SH 109. Keflvíkingur var fyrstur í röð átján báta sem þjóðverjar smíðuðu fyrir íslendinga í Boizenburg á árunum 1964-1967. 

Faxi, blað Málfundafélagsins Faxa sagði svo frá komu Keflvíkings í desembermánuði 1964: 

S.l. fimmtudag, 3. des., kom til Keflavíkur nýr bátur, Keflvíkingur KE 100, sem smíðaður er í Boisenburg í Þýzkalandi. 

Keflvíkingur er 260 lestir að stærð með 660 hestafla Lister Blackstone dísilvél og 10 mílna ganghraða. Tvö Asdicfiskileitartæki eru í bátnum, svo og dýptarmælir og ratsjá af Kelvin Hughson gerð og öll fullkomnustu og nýjustu siglingartæki. Íbúðir eru fyrir 15 menn í eins og tveggja manna herbergjum. Til nýmælis má telja, að sérstakur vökvaknúinn gálgi er fyrir kraftblökkina, sem notuð er við síldveiðar, og er gálginn gerður af norsku Rappverksmiðjunum, sem smíða kraftblakkirnar. Á heimleið fékk Keflvíkingur mjög vont veður og varð að leita vars við Færeyjar, en í þessu veðri reyndist báturinn afburða góður í sjó að leggja. 

Eigendur þessa nýja Keflvíkings eru hlutafélagið Keflavík h.f. og skipstjórinn, Einar Guðmundsson, að nokkrum hluta 

Skipið býr sig nú til síldveiða í Faxaflóa eða annars staðar þar, sem síldin er. 

Faxi býður hið glæsilega skip velkomið í skipakost Keflvíkinga. 

Síðasta nafn bátsins var Þórsnes SH 109 eins og segir að ofan, reyndar skráð SH 198 eftir að því var lagt. Það fór í pottin í Ghent í Belgíu um mitt ár 2017.

Á þessum 53 árum sem skipið var í íslenska flotanum var heimahöfn þess allan tímann á Suðurnesjunum fyrir utan þessi síðustu fimm sem það var með heimahöfn í Stykkishólmi.

 

967. Keflvíkingur KE 100. © Gunnar Hallgrímsson.

 

967. Keflvíkingur KE 100. © Sigfús Jónsson.

 

967. Bergur Vigfús GK 53 ex Keflvíkingur KE. © Hafþór Hreiðarsson.

 

967. Marta Ágústsdóttir GK 31 ex Bergur Vigfús GK 53. © Hafþór 2004.

 

967. Marta Ágústsdóttir GK 14 ex GK 31. © Hafþór Hreiðarsson 2009. 

967. Þórsnes SH 109 lætur úr höfn á Íslandi í síðasta skipti. © ÓFÓ 2017.

 

 

22.02.2018 11:38

Vega Philipp

Þetta 155 metra langa flutningaskip, Vega Philipp, myndaði félagi Svafar Gestsson í Avonmouth á Stóra-Bretlandi í gær.

Vega Philipp var smíðað árið 2007 og er eins og áður segir 155 metrar að lengd, breiddin er 21 meter og það mælist 8.971 GT að stærð.

Hét fyrsta árið Estime en síðan Beluga Mediation til ársins 20011 er það fær núverandi nafn. 

Vega Philipp siglir undir fána Möltu og er með heimahöfn í Valetta.

Vega Philipp ex Beluga Mediation. © Svafar Gestsson 2018.

 

 

21.02.2018 16:12

Polar Amaroq á Skjálfanda

Tók þessa mynd áðan sem sýnir grænlenska loðnuskipið Polar Amaroq á Skjálfanda en það tók eina roku þar inn og er nú komið út í flóann aftur þar sem nokkur norsk loðnuskip eru ennþá.

Í frétt á heimasíðu Síldarvinnslunnar í dag sagði m.a:

Polar Amaroq skipaði frystri loðnu um borð í flutningaskip í Norðfjarðarhöfn í gær en hélt síðan til veiða norður fyrir land þar sem norski loðnuflotinn hefur haldið sig. Heimasíðan ræddi við Geir Zoëga skipstjóra á Polar Amaroq í morgun en þá voru þeir Polarmenn með fyrsta kast á Skjálfanda. „ Við fundum loðnu strax og við komum hér og erum að draga núna. Það er eitthvað í þessu hjá okkur. Loðnan stendur djúpt en Norðmennirnir segja að hún komi upp á kvöldin. Mér líst bara vel á þetta en það var veðurútlitið sem gerði það að verkum að við fórum hingað norður fyrir land. Hér verður blíða á morgun og eftir morgundaginn hverfa norsku skipin á braut. Þá verðum við einir hér. Hrognafyllingin í loðnunni hérna er um 15% og það hentar okkur vel,“ sagði Geir.

Eins og fram kemur hjá Geir er einungis einn dagur eftir af þeim tíma sem Norðmenn mega stunda loðnuveiðar við landið. Eru allar líkur á því að þeir muni nánast ljúka við að veiða þann kvóta sem þeir hafa til ráðstöfunar á þeim tíma.

Polar Amaroq GR 18-49 ex Gardar. © Hafþór Hreiðarsson 2018.

21.02.2018 16:00

Vésteinn GK 88 - Ný Cleopatra 50

Útgerðarfélagið Einhamar ehf í Grindavík fékk í síðustu viku afhentan nýjan yfirbyggðan Cleopatra 50 beitningavélarbáta frá Bátasmiðjunni Trefjum í Hafnarfirði.

Framkvæmdastjóri Einhamars er Stefán Kristjánsson.

Nýi báturinn heitir Vésteinn GK 88. Báturinn er 15metrar á lengd og mælist 30brúttótonn.  Vésteinn er systurskip Gísli Súrssonar GK 8 og Auðar Vésteins SU 88 sem útgerðin fékk afgreidda frá Trefjum 2014.  

Bátarnir eru gerðir út á krókaaflamarki.  Theodór Ríkharðsson verður skipstjóri Vésteini.  Óskar Sveinsson er útgerðastjóri Einhamars.

 

Aðalvél bátsins er af gerðinni Doosan 4V222TI 880hö (22L) tengd frístandandi ZF 665 V-gír.

Rafstöð er af gerðinni Broadcrown 100hö frá Aflhlutum.

Báturinn er útbúinn siglingatækjum af gerðinni JRC og Raymarine frá Sónar ehf.

Báturinn er einnig útbúin með vökvadrifnum hliðarskrúfum að framan og aftan sem tengdar eru sjálfstýringu bátsins.

Báturinn er útbúinn til línuveiða.  Beitningavél, rekkakerfi og línuspil er frá Mustad í Noregi.

Búnaður á dekki er frá Stálorku.

Ísvél og forkælir er frá Kælingu ehf.

Löndunarkrani á er af gerðinni TMP frá Ásafli ehf.

 

Lífbátar og annar öryggisbúnaður bátsins kemur frá Viking.

 

Rými er fyrir allt að 41stk 460lítra kör í lest.  Millidekk er lokað með aðgreindu dráttarrými.  Í bátnum er upphituð stakkageymsla.  Stór borðsalur er í brúnni.  Svefnpláss er fyrir fimm í lúkar auk fullkominnar eldunaraðstöðu með eldavél, bakarofni, örbylgjuofn, ísskáp og uppþvottavél.

Báturinn er útbúinn til lengri útiveru ef þarf og aðbúnaður um borð fyrir áhöfn í takt við það.

2908. Vésteinn GK 88. © trefjar.is 2018.

21.02.2018 09:46

Wilson Heron

Flutningaskipið Wilson Heron við Þvergarðinn í Húsavíkurhöfn. Þetta var 1. apríl 2009 og stórhríðarveður á Húsavík.

Wilson Heron var smíðað 1994, er 91 metrar að lengd og 14 metra breitt. Stærð þess er 2.901 GT og það siglir undir fána Möltu.

Wilson Heron. © Hafþór Hreiðarsson 2009.

 

20.02.2018 12:14

Christina E á Húsavík

Christina E, norska loðnuskipið, kom til Húsavíkur að kveldi sl. laugardags og fór aftur síðdegis á mánudag eftir að gert hafði verið við nótina.

Áhafnarmeðlimir nutu aðstoðar Kára Páls Jónassonar netagerðarmeistara hjá Ísfelli og Bjarka Helgasonar stýrimanns á Brimnesi RE 27 við saumaskapinn.

"Þetta glæsilega uppsjávarskip var smíðað af skipasmíðastöðinni Karstensens Skibsværft A/S og afhent eiganda sínum Rederiet Ervik & Sævik AS þann 30 Maí 2011, byggingarkostnaðurinn var um 300 milljónir Norskar. 

Skipið 80,40 metra langt, 16,60 metra breitt og tekur 2000 tonn. Aðalvélin er MaK og er 6200 hestöfl og kemur skkipinu upp á 17 mílna hraða, tvær ljósavélar eru um borð hvor um sig 1800Kw, einn ásrafall 3000Kw og neyðarrafall 315Kw. Tvær hliðarskrúfu eru framan og aftan, hvor um sig 1200Kw, skipið hefur heimahöfn í Fosnavåg Noregi".

Skrifar Áki Hauksson í júnímánuði 2015 en þá náði hann flottum myndum af þessu skipi í Måløy og birtust hér á síðunni.

 

Christina E M-150-HØ. © Hafþór Hreiðarsson 2018.

 

Christina E M-150-HØ. © Hafþór Hreiðarsson 2018.

 

Kári Páll og Bjarki gera við nótina ásamt áhafnarmeðlim © HH 2018

 

Christina E M-150-HØ. © Hafþór Hreiðarsson 2018.

 

Christina E M-150-HØ. © Hafþór Hreiðarsson 2018.

 

Christina E M-150-HØ. © Hafþór Hreiðarsson 2018.

 

Christina E M-150-HØ. © Hafþór Hreiðarsson 2018.

 

20.02.2018 10:14

Wilson Plato

Hér er flutningaskipið Wilson Plato að koma til Húsavíkur vorið 2007. Sennilega með áburð. Wilson Plato var smíðað 1989 og er með heimahöfn í Bridgetown á Barbados.

Skipið er 89 metra langt og 14 metra breitt, mælist 1990 GT að stærð.

Wilson Plato. © Hafþór Hreiðarsson 2007.

 

19.02.2018 16:58

Hörður Björnsson

Línuskipið Hörður Björnsson ÞH 260 kom til hafnar á Húsavík í morgun en hann hefur verið að fiska vel á þessu kvótaári.

264. Hörður Björnsson ÞH 260 ex Gullhólmi SH. © Hafþór 2018.

 

264. Hörður Björnsson ÞH 260 ex Gullhólmi SH. © Hafþór 2018.

18.02.2018 22:25

Gunnar Langva

Norska loðnuskipið Gunnar Langva við loðnuveiðar á Skjálfanda í dag. Gunnar Langva er 75 metrar á lengd og 14 metrar á breidd, mælist 2.223 GT að stærð. Smíðaður 2003 og heimahöfn í Álasundi.

Samkvæmt upplýsingum frá Óskari Franz er þessi Gunnar Langva kominn á söluskrá þar sem útgerðin lætur byggja nýtt skip sem afhendast á 2019.

Gunnar Langva M-139-A. © Hafþór Hreiðarsson 2018.
Flettingar í dag: 1344
Gestir í dag: 237
Flettingar í gær: 1720
Gestir í gær: 399
Samtals flettingar: 8677501
Samtals gestir: 1908938
Tölur uppfærðar: 24.9.2018 06:35:00
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is