Skipamyndir Hafþórs Hreiðarssonar

30.06.2018 22:19

Frystitogarinn Volstad

Eiríkur Sigurðsson skipstjóri á rækjutogaranun Reval Viking sendi mér þessa mynd sem hann tók í morgun. Hún sýnir norska frystitogarann Volstad á toginu.

Volstad er 74,7 metrar að lengd og 15,4 metra breiður og mælist 3430 GT að stærð. Smíðaður 2013 í skipasmíðastöðinni Tersan utan við Istanbul í Tyrklandi.

3YYB. Volstad M-11-A. © Eiríkur Sigurðsson 2018.

29.06.2018 23:05

Óli Gísla verður Sævík GK

Línubáturinn Óli Gísla GK 112 hefur samkvæmt vef Fiskistofu fengið nafnið Sævík GK 757. Eins og kunnugt er keypti Vísir hf. í Grindavík útgerð Óla Gísla, Sjávarmál ehf.  fyrir skömmu.

2714. Óli Gísla GK 112 nú Sævík GK 757. © Jón Steinar.

29.06.2018 18:32

Ósk ÞH 54

Ósk ÞH 54 er á handfærum þessa dagana og hér kemur hún að landi á Húsavík í gær.

Áður Guðný NS 7.

2447. Ósk ÞH 54 ex Guðný NS. © Hafþór Hreiðarsson 2018.

29.06.2018 10:13

Færabátar koma að landi í Ólafsvík

Vonsku­veður var á Breiðafirði í gær og á mbl.is sagði að nokkr­ir strand­veiðibátar frá Ólafs­vík hafi róið snemma um nóttina til þess að freista þess að vera á und­an veðrinu. 

Frosti HF var ekki einn þeirra en skipperinn á honum var á bryggjunni að mynda bátana þegar þeir komu að og hér má sjá nokkra þeirra.

2813. Magnús HU 23. © Alfons 2018.

 

7757. Jónas SH 159 ex Jói á Nesi SH. © Alfons 2018.

 

6342. Oliver SH 248 ex Seley SH. © Alfons 2018.

 

2586. Júlli Páls SH 712 ex Alda HU. © Alfons 2018.

 

2939. Katrín II SH 475. © Alfons 2018.

29.06.2018 10:01

Hrafnreyður KÓ 100

Hrefnubáturinn Hrafnreyður KÓ 100 lét úr höfn í Hafnarfirði í þann mund sem Berlin kom að bryggju á dögunum. Maggi Jóns tók þessa mynd og ljóst að stærðarmunurinn er nokkur.

Hrafnreyður hét upphaflega Ottó Wathne NS 90, smíðaður á Seyðisfirði 1973. Seldur til Hornafjarðar 1980 og fékk þá nafnið Bjarni Gíslason SF 90. Yfirbyggður 1991 og einnig skipt um aðalvél.

Í maí 2005 varð hann VE 30 og í ársbyrjun 2007 fékk hann nafnið Valur ÍS 18. Það nafn bar hann þar til núverandi nafn kom á hann í maí 2010.

1324. Hrafnreyður KÓ 100 ex Valur ÍS 18. © Maggi Jóns 2018.

28.06.2018 12:05

Freymundur ÓF 6

Þessa mynd tók ég á Ólafsfirði fyrir nokkur en hún sýnir Freymund ÓF 6 nýskveraðann og flottan í miðbæ Ólafsfjarðar.

Kristján Nói Kristjánsson bátasmiður á Akureyri smíðaði Freymund fyrir Magnús J. Guðmundsson Ólafsfirði og syni hans Sigurð og Júlíus Magnússyni.

Á vef Árna Björns Árnasonar, aba.is, segir m.a:

Afturbyggður súðbyrðingur með kappa. Stærð 3,87 brl. Smíðaár 1954. Fura og eik.
Upphaflega vélin í bátnum var 16 ha. Lister, sem var í honum fyrstu 12 árin. Næsta var sett í bátinn 28 ha. Volvo Penta og var hún í bátnum fram til ársins 1980 en þá var henni skipt út fyrir 22 ha. SABB og er sú vél enn í bátnum árið 2014.
Báturinn var smíðaður fyrir Magnús J. Guðmundsson, Ólafsfirði og syni hans þá Sigurð og Júlíus Magnússyni, Ólafsfirði. 
Eftir lát Magnúsar áttu þeir bræður bátinn saman en eftir lát Sigurðar þá hefur Júlíus Magnússon átt bátinn einn og á enn árið 2014, en í gegnum eignarhaldsfélagið Freymund ehf. Ólafsfirði frá árinu 2002.
Bátnum hefur alla tíð verið sérstaklega vel við haldið en aldur hans spannar nú 60 ár. 
Árið 1997 var báturinn endurbyggður af skipasmiðunum Gunnlaugi Traustasyni og Sigurði Lárussyni. Endurbyggingin fólst í að sauma bátinn upp og endurnýja á hluta banda og byrðingsborða. Ný skjólborð voru smíðuð á bátinn og hvalbakur lagfærður. 
Freymundur ÓF-6 var afskráður 29. janúar 2014 og er nafn hans og einkennisstafir nú  komnir á annan bát. 

Freymundur sá sem sagt er frá í restina er í eigu Árna Helgasonar ehf. og spurning hvort hann það fyrirtæki hafi látið skvera gamla Freymund upp og koma honum þarna fyrir.

5313. Freymundur ÓF 6. © Hafþór Hreiðarsson 2018.

28.06.2018 00:03

Viðey RE 50

Óskar Franz tók myndir í kvöld þegar Viðey RE 50 kom til hafnar í Reykjavík. Viðey er þriðja eyjan sem HB Grandi lét smíða í Tyrklandi, hinar eru Engey RE 1 og Akurey AK 10.

Á vef HB Granda segir 25. júní að veiðar hjá Viðey hafi byrjað vel:

,,Það er óhætt að segja að allt hefur gengið eins og í sögu eftir að við tókum við skipinu. Tilraunatúrarnir gengu vel og það tók skamman tíma til að fá allt til að virka eins og að var stefnt. Við erum búnir að fara í tvær veiðiferðir á Vestfjarðamið og vorum með nánast fullfermi í báðum túrum,“ segir Jóhannes Ellert Eiríksson, skipstjóri á Viðey RE, hinum nýja ísfisktogara HB Granda.

Viðey kom til landsins í desember sl. en eftir komuna var skipinu siglt til Akraness þar sem millidekk skipsins var innréttað og sjálfvirku lestarkerfi komið fyrir. Því verki lauk fyrir sjómannadag.

,,Við erum reyndar enn að læra á tækni- og tölvubúnaðinn en heilt yfir hefur allt farið fram úr okkar björtustu vonum,“ segir skipstjórinn sem er hæst ánægður með nýja skipið.

,,Það er í raun ekki hægt að lýsa viðbrigðunum að fara af Ottó N. Þorlákssyni RE yfir á nýja skipið. Ottó er reyndar gott skip en með sínar takmarkanir. Á Viðey finnur maður varla fyrir veltingi. Hljóðvistin er sú besta sem hægt er að hugsa sér. Maður í koju heyrir ekki þegar verið er að hífa og skrölt í keðjum heyrist ekki í íbúðum. Stundum var ekki hægt að tala saman um borð í Ottó vegna hávaða en það vandamál heyrir sögunni til. Um annan aðbúnað fyrir mannskapinn þarf ekki að fjölyrða. Allt er fyrsta flokks,“ segir Jóhnnes Ellert eða Elli eins og hann er jafnan nefndur.

Elli hefur góða reynslu af notkun svokallaðra Bacalao trolla á veiðum og um borð í Viðey eru tvö ný slík troll. Toghlerar eru af gerðinni Thyborön og vegur hvor um sig fjögur tonn.

,,Við erum reyndar nú með mun stærri troll en við vorum með á Ottó. Hlerarnir voru þriggja tonna en þrátt fyrir það er troll og hlerar nú mun léttari í drætti en áður,“ segir Jóhannes Ellert Eiríksson.

 

2895. Viðey RE 50. © Óskar Franz 2018.

27.06.2018 21:01

Viking Saga á Húsavík

Ég tók þessar myndir í kvöld þegar brunnbáturinn Viking Saga frá Bergen kom til Húsavíkur. Báturinn var hér fyrir í byrjun vikunnar en fór vestur í Dýrafjörð og er kominn aftur.

Er að ég held í seiðaflutningum.

Viking Saga var smíðaður 1999 og hét upphaflega Havstrand. Það nafn bar hann til ársins 2014 að hann fær nafnið Lifjell. Það var svo 2017 sem hann verður Viking Saga.

Báturinn er 42 metrar á lengd og 9 metra breiður.

 

Viking Saga ex Lifjell. © Hafþór Hreiðarsson 2018.

 

Viking Saga ex Lifjell. © Hafþór Hreiðarsson 2018.

 

Viking Saga ex Lifjell. © Hafþór Hreiðarsson 2018.

 

Viking Saga ex Lifjell. © Hafþór Hreiðarsson 2018.

27.06.2018 19:15

Berlin NC 105

Frystitogarinn Berlin NC 105 kom til hafnar í Hafnarfirði í dag og náði Maggi Jóns þessum myndum við það tækifæri.

Systurskip Cuxhaven NC 100 sem ég birti myndir af í gær.

DFQB. Berlin NC 105. © Magnús Jónsson 2018.

 

DFQB. Berlin NC 105. © Magnús Jónsson 2018.

 

Berlin NC 105 - Eldborg EK. © Magnús Jónsson 2018.

27.06.2018 13:22

Sævík GK 257

Það hefur aðeins borið á því að menn spyrji hvort nýi Sighvatur GK 57 sé þessi Sævík GK 257 sem sést hér láta úr höfn á Húsavík. 

Svo er ekki, þessi fékk síðar nafnið Valur ÍS 82 og því næst Guðrún Guðleifsdóttir ÍS 25 sem var einmitt hennar fyrsta nafn árið 1965. Var að vísu ÍS 102 þá.

Síðasta nafnið á þessu skipi var Fram ÍS 25 og fór það í pottinn 2014 að ég held.

Nöfnin sem skipið bar var: Guðrún Guðleifsdóttir, ÍS 102, síðar ÍS 364. Boði KE 132, Boði GK 24, Eldeyjarboði GK 24, Aðalvík KE 95, Sævík GK 257, Valur ÍS 82, Guðrún Guðleifsdóttir ÍS 25 og Fram ÍS 25.

971. Sævík GK 257 ex Aðalvík KE. © Hafþór Hreiðarsson 2004.

 

27.06.2018 10:59

Máni

Hvalaskoðunarbáturinn Máni kemur hér að landi á Dalvík fyrir skömmu.

Þetta er síðasti eikarbáturinn, af þessari stærð amk., sem Skipavík í Stykkishólmi smíðaði.

Í Morgunblaðinu 23. júní 1977 var eftirfarandi frétt að finna:

Í SEINUSTU viku var hleypt af stokkunum 50 lesta nýsmíði hjá Skipasmíðastöðinni Skipavík h.f. í Stykkishólmi. 

Báturinn hlaut nafnið Ásbjörg ST 9 og er heimahöfnin Hólmavík. Eigendur eru þrir, þeir Benedikt Pétursson, Guðlaugur Traustason og Daði Guðjónsson, allir til heimilis á Hólmavík. 

Báturinn er smíðaður úr eik og er búinn öllum fullkomnustu siglinga- og fiskileitartækjum. Aðalvél er 360 hestafla og einnig eru tvær hjálparvélar. Báturinn er útbúinn til tog-, neta- og línu- veiða. Hann verður afhentur eigendum eftir nokkra daga. 

 

1487. Máni ex Númi RE. © Hafþór Hreiðarsson 2018.

27.06.2018 10:31

Ottó N Þorláksson

Hér liggur Ottó N Þorláksson RE 203 við bryggju í Reykjavík. Verið að skvera hann áður en hann hefur veiðar fyrir nýja eigendur en eins og kunnugt er keypti Ísfélag Vestmannaeyja hf. togarann af HB Granda.

Hann mun leysa Suðurey ÞH 9 af hólmi hef ég heyrt.

1578. Ottó N Þorláksson RE 203. © Hafþór Hreiðarsson 2018.

26.06.2018 09:56

Hoffell SU 80

Hér kemur mynd Hannesar Baldvinssonar af Hoffelli SU 80 koma til hafnar á Siglufirði.

Hoffell var smíðað í Noregi árið 1959 og í 11-12 tbl. Sjómannablaðsins Víkings það ár kom þessi frétt um komu skipsins til landsins:

Nýtt glæsilegt fiskiskip hefur bætzt í íslenzka fiskiskipaflotann, er það Hoffell SU 80, er kom til Fáskrúðsfjarðar í byrjun októbermánaðar. 

Skipið er byggt í Noregi hjá Ejnar S. Nielsens Mek. Verksted Harstad, eig.: Hraðfrystihús Fáskrúðsf j. hf. Fáskrúðsfirði. 

Útbúnaður er hinn fullkomnasti og skipið mjög vandað. Aflvél er 400 ha. Wichmann. Hjálparvél 25 ha., tveir 220 volta jafnstraums rafalar, annar 12 kw. og hinn 8 kw. Auk þess er 24 volta  rafmagn frá rafgeymum til vara í öll ljósastæði skipsins. Decca radar 48 mílna, dýptarmælir af gerðinni Simrad, ásamt síldarasdic. Sími er um allt skipið og magnari í stýrishúsi þannig að skipstjórinn þarf ekki að kalla sig hásann fram á þilfarið, eða í land. Talstöð er af gerðinni Stentor og er hún 100 wött.

Frystiútbúnaður er í fisklestinni og getur þar verið hvort sem vill kæling 0 gr. C. eða 22 stiga frost. Lestarrúmið er að sjálfsögðu einangrað og klætt aluminium. Öll lestarborð eru af sömu lengdum og skilja sjómenn hversu mikilsvert það er. Í lúkar eru 2 þriggjamanna herbergi og 1 fjögurramanna, en í káetu eru tvö einsmanns herbergi (fyrir stýrimann og vélstjóra) og auk þess eitt tveggjamanna herbergi. 

Vindur eru 8 lesta togvinda og 2.5 lesta línuvinda. Allar íbúðir eru klæddar plasti og fægðum harðviðarlistum. 

Skipið er keypt hjá umboði Magnús Jensson h.f. 

Víkingurinn óskar eigendum og skipstjóra, sem er Friðrik Stefánsson, til hamingju með þetta glæsiega skip.

 

Svo mörg voru þau orð en Hoffellið var 129 brl. að stærð. Það var lengt 1966 og mældist þá 177 brl. að stærð.1973 var sett í það 580 hestafla Cummins aðalvél. Í desember 1974 er Hoffel selt þeim Víkingi Halldórssyni, Pétri Bogasyni og Guðlaugi Wíum í Ólafsvík. Fékk skipið nafnið Fagurey SH 237. Selt tæpu ári síðar til Stokkseyrar, kaupandi Útgerðarfélagið Jórunn h/f og fékk skipið nafnið Jórunn ÁR 237. Um mitt ár 1977 kaupir Stakkholt h/f í ólafsvík skipið sem fær nafnið Jón Jónsson SH 187. 1980 var sett í skipið 800 hestafla Cummins aðalvél í febrúar 1988 var skipið selt aftur til Stokkseyrar. Kaupandi Marver h/f sem nefnir skipið Haförn ÁR 115. (Heimild Íslensk skip)

1995 er hann orðinn Haförn SK 17 í eigu rækjuvinnslunnar Dögunar h/f á Sauðárkróki. 1998 er hannn seldur Auðbjörgu h/f í Þorlákshöfn og fær sitt síðasta nafn sem var Skálafell ÁR 50. Skálafell var afskráð í febrúar 2014 og fór í brotajárn erlendis einhverju síðar.

Spurning hvenær hann var yfirbyggður ? Var hálfyfirbyggður þegar ég sá hann fyrst 1983.

100. Hoffell SU 80. © Hannes Baldvinsson Siglufirði.

 

 

 

25.06.2018 23:38

Cuxhaven NC 100

Cuxhaven NC 100 hefur verið að landa á Akureyri að undanförnu og Jón Steinar tók þessar myndir í síðustu viku sem sýnir togarann á útleið.

DFQH. Cuxhaven NC 100. © Jón Steinar 2018.

 

DFQH. Cuxhaven NC 100. © Jón Steinar 2018.

25.06.2018 22:37

Sighvatur GK 57 - Myndasyrpa

Hér kemur myndasyrpa sem ég tók þegar Sighvatur GK 57 kom til heimahafnar í Grindavík eftir endurbyggingu í Póllandi. Skipið var um eitt ár í Algorskipasmíðastöðinni þar sem það var allt endurbyggt og lengt, um 2/3 hluta stálsins er enn á sínum stað í skrokk skipsins. Allt annað er nýtt.

Sighvatur mun leysa nafna sinn af hólmi sem smíðaður var í Boizenburg 1965 og hét upphaflega Bjartur NK 121.

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.

 

1416. Sighvatur GK 57 ex Sævík GK. © Hafþór Hreiðarsson 2018.
Flettingar í dag: 1670
Gestir í dag: 128
Flettingar í gær: 2775
Gestir í gær: 233
Samtals flettingar: 8828458
Samtals gestir: 1942578
Tölur uppfærðar: 15.11.2018 15:28:29
 










Eldra efni

clockhere

Tenglar

Um mig

Nafn:

Hafþór Hreiðarsson

Farsími:

8956744

Heimilisfang:

Sólbrekka 29

Staðsetning:

Húsavík

Heimasími:

4642030

Önnur vefsíða:

www.640.is